Otsailaren 10era bitartean, "Naturarekin zuzenean" erakusketa izango da ikusgai Sopelako Kurtzio Kultur Etxean. Olaia San Miguel Cantero da bere egilea, Arte Ederretan lizentziatua eta margo zein marrazketa irakaslea. Erakusketa tamaina desberdinetako pintura lanez osatuta dago eta San Miguelen azken urteetako lanaren laburpena da, tokiko iturriek zehaztu dutenez. Obra guztiak naturarekin eta naturako espazioekin erlazionatuta daude eta argi ikusiko da urteetan zehar jarraitu duen eboluzioa. Margo guztiak abstraktuak dira nahiz eta batzuetan figuraren bat sumatu ahal izan, eta elkartzen dituen ezaugarri komuntzat bere bizipenetatik ateratako lanak direla esan daiteke. Argazkian, "Baratzean" izeneko pintura lana / © Sopelako Udala.
Otsailaren 7tik 23ra bitartean, berriz, euskal inauteri tradizionalei buruzko erakusketa izango da Kurtzio Kultur Etxean. Euskal Herriko Inauteri Tradizionalak ezagutzera emateko helburuarekin antolatu du Uribe Kostako Mankomunitateko Euskara Zerbitzuak. "Euskal Herriko inauteri garrantzitsuenen gaineko errepasoa egiten du. Pertsonaiek, belarraren usainak, musikak eta abarrek lagunduko digute horren zaharra den Euskal Herriko ohitura ezagutzen eta miresten", azaldu dutenez. Erakusketa osatzen duten 18 pertsonaiak izango dituzte lagun ikusleek, gure tradizioetan barrena egindako bidaia hunkigarriak: Altsasuko, Ituren-Zubietako, Lantzeko, Ziburuko eta Donibaneko (Iruñea) inauterietako pertsonak, hain zuzen ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun