Gernikako Akordioari baietza eman zion Sopelako Udalbatzak, urtarrilaren 26an izandako osoko bilkuran. Ezker abertzaleak, EAk, Alternatibak eta Berdeek aurkeztu zuten proposamena eta talde horien aldeko botoekin aurrera egin zuen mozioak, Sopela.net agerkari digitalak zabaldu duenez. EAJ abstenitu egin zen, eta PP zein PSE-EE taldeetako zinegotziek ezezkoa eman zuten. Azken bi alderdi horiei "normalizazio politikoari aukera eman diezaioten" eskatu zieten ezker abertzaleko zinegotziek, "interes elektoralista hutsak, nola edo hala Lakuan jarraitzea, ez aurrejartzeko herri honen normalizazio politikoari". "Bada garaia zentsurik gabeko sarekadarik egiten uzteari (agian zentsua maltzurra badute sarekada hauek: probokatzea eta leherraraztea prozesu hau). Bada garaia egungo espetxe politikoarekin bukatzeko, eta bada garaia Euskal Herriko jarduera politiko guztiak legalak izan daitezen", gaineratu zutenez. Argazkian, Sopelan babes zabala jaso du Gernikako Akordioak.
EAJri, berriz, "ausardia" eskatu zioten, eta Urkulluren hitzak gogorarazi zituzten: “Urkulluk esan zion ETAri Gernika eta Bruselan artean ez galtzeko, eta Euskal Herriari erantzuteko". Hautetsi independentisten arabera, "ematen du ETA ez dela galdu Gernika eta Bruselan artean, bai Gernikako sinatzaileek, bai Bruselakoek onartu dutelako ETAk emandako su eten egiaztagarria, iraunkorra eta orokorra". Jelkideei gauza bera eskatu zioten: "ez galtzeko Madrilen, Ferraz eta Genova kaleen artean, eta kale horietan esaten denari entzun beharrean, Euskal Herriari erantzuteko… sinesmen osoa baitugu Euskal Herriaren gehiengoak guztiz bat egiten duelako Gernikako Akordioaren edukiarekin". Halaber, "lotsagarritzat" jo zuten EAJk ere "interes elektoralista aurrejartzea (hainbat alkatetza edo Diputazioren batean agintean egoteko) bizi garen gatazka gainditu ahal izateari elkarrizketa eta akordioaren bidez; gatazka bakar-bakarrik gauzatzeari bide politikoetatik, baketsuetatik eta demokratikoetatik”. EAJk proposamena ez zuela oztopatuko erantzun zuen, eta ildo horretan, abstenituko zela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun