Hainbat edukiontzi erretzea egotzita 23.000 euroko kalte ordaina ezarri nahi diete Leioako bi gazteri
Urtarrilaren 6an, goizaldeko 3:45ean, 18 urteko gizon bi atxilotu zituen Leioako Udaltzaingoak, herri erdialdean eta Basaez auzoaren artean dagoen Laubide zonaldean edukiontziak erreten aritzea leporatuta. Udalak joan den astean zabaldu zuenez, mutilek "ez dute inolako harreman politikorik, suteak dibertitzeko baino ez zituzten eragiten". Tokiko iturrien arabera, udaltzainek "ezustekoan" harrapatu zituzten gazteak, "edukiontziaren tapa igota zutenean eta barrualdeari sua ematen zirenean". Momentuan, ihes egin omen zuten, baina poliziek horiek harrapatzea lortu zuten. Udaltzaingoak dioenez, "hau ez da izan gazte hauek erre duten edukiontzi bakarra". Gau berean, sei edukiontziri su ematea egozten diete. Bestalde, atxilotuak Leioan jazotako antzeko hainbat gertaeren "arduradunak" direla dio Udaltzaingoa. Horiek guztiak leporatuta, gutxienez, 23.000 euroko kalte ordaina eskatuko diete gazteei. Argazkian, erretako edukiontzia Leioan / © Leioa.net.
Udaltzaingoak duela hilabete pare bat abiatutako ikerketak frogatu omen du gazte horiek herrian gertatutako beste hainbat suteren egileak direla; 2010eko abenduan eta 2011 hasieran gertatutakoak, polizia iturrien arabera. Tarte horretan bederatzi edukiontzi erre eta kotxe bati kalteak eragin zizkioten ezezagunek Leioan. Horretaz gain, atxilotutako mutilak beste dozena bat suteen arduradunak izan daitezkeela dio Udaltzaingoak, baina oraindik azken horiek ikertzen ari da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun