Proiektuaren lehenengo atalean, dozena bi ikaslek hainbat ofizio ikasi zituzten eta praktikan jarri zituzten eraikinean bertan, horien artean: hargintza, zurgintza eta igeltserotza. Horiek burututako lanek jatorrizko eraikuntza berreskuratzea zuten helburu, hau da, urteekin gehitutako eraikin zatiak kendu, hormak garbitu eta jatorrizko dorrea utzi. Horrez gain, egitura indartu zuten. Lehenengoko solairu biak 84 metro koadro dituzte (horiei txapitula formako hirugarren solairu bat gehitu behar zaio) eta hamar metroko altuera.
Landa jauregia
Ikerketa sakon bat egin ostean, adituek Ondizko dorretxea XVI. mendeko eraikina dela ziurtatu dute, 1515 ingurukoa, hain zuzen, orain arte zaharragoa zela uste bazen ere. Ikerketak aipatzen duenez dorretxea baino landa-jauregia da Ondizkoa, Leioako familia aberats batena. Udalerriko eraikin zaharrenetariko horren erabilera lurzorua, 84 metro koadrokoa da, eta altueraz 8,5 edo 10 metro ditu. Zaharberritze horrekin Leioako ondare historikoaren berreskurapenarekin jarraitzen du Udalak. Azken urteetan Mendibile Jauregia, Elexalde errota eta Kortesenabarri baserria berritu dituzte, eta orain Ondizko dorrearen txanda da.
Leioako Udalak Ondiz auzoan dagoen XVI. mendeko dorretxea berreskuratzeko obrak esleitu ditu, herriaren ondare artistiko eta kulturala mantentzeko asmoz. Lanak egiteko 600.000 euro bideratu ditu tokiko erakundeak. Udal iturriek adierazi dutenez, aipatu eraikuntza zaharberritzeko obrak 2009an hasi ziren, INEM Espainiako Enplegu Institutuarekin batera abian jarritako enplegu tailer baten bidez. Proiektuak hiru fase desberdin aurreikusten zituen. "Lehenengo fasea amaitzerakoan, baina, INEMek proiektua bertan behera utzi zuen, eraikinaren berreskurapena arriskuan jarriz. Eskakizun berria aurkeztu genion lanak amai zitzan, baina ezetza jaso genuen. Hortaz, Udalak berak jarritako aurrekontuarekin lanekin jarraitzea erabaki dugu", azaldu dute tokiko arduradunek. Horretarako, Bizkaiko Foru Aldundiaren diru-laguntza txikia ere jasoko dute. Obrak amaitzen dituztenean eta eraikina guztiz berrituta dagoenean —urte honen amaieran izatea espero dute—, Leioako elkarte batek okupatuko du. Argazkia: © Leioa.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun