Alkarbidek sustatutako egitasmoa Bizkaiko 43 udalerri eta hiru mankomunitateren ekimen bateratua da eta informazio-kanpaina urte hasieran zabaldu da, 2-3 urteko umeen eskolatze-aldia baino zertxobait lehenago, gurasoek bidalitako informazioaren inguruan hausnarketa egiteko astia izan dezaten. Alkarbidek koordinatu duen ekimen honetan guztira 7.400 liburuxka inguru banatu dira kanpainan parte hartu duten udalerrietan. Umeak eskolan lehen aldiz matrikulatzen dituzten gurasoei D ereduari buruzko informazioa ematea eta eredu hori aukeratzeko arrazoiak azpimarratzea da kanpainaren helburu nagusia.
Parte-hartzaileak Bizkaiko 21 udal eta hiru mankomunitate dira: Abanto-Zierbena, Arrieta, Arrigorriaga, Balmaseda, Berriz, Bilbo, Erandio, Etxebarri, Fruiz, Gamiz-Fika, Gatika, Gordexola, Laukiz, Leioa, Maruri-Jatabe, Mungia, Muskiz, Ortuella, Urduña, Zaldibar eta Zierbena udalerriak, eta Enkarterriko, Txorierriko eta Uribe Kostako mankomunitateak.
Euskarriak
Kanpainaren osagarri nagusiak hiru dira: batetik, udaleko ordezkariren batek (alkateak edo euskara zinegotziak) sinatutako gutuna, euskarazko ereduetan ikasteak dakartzan abantailen berri ematen duena; bestetik, gutuna bidaltzeko gutun azala, eta gutun azalaren barruko aldean agertzen dira D eredua aukeratzeko arrazoiak; azkenik, eskolan hasiko diren neska-mutilentzako oparia (kanpainaren goiburua idatzita duen neurgailua). Gutxi gorabehera, kanpainaren sustatzaile diren udalerrietan bizi eta 2-3 urteko umeak dituzten 7.400 familia izan dira kanpainaren hartzaileak.
Gurasoek bi edo hiru urte bitarteko haurrak D ereduan matrikulatzeko kanpaina egingo dute aurten ere eskualdeko ia udal guztiek. Izan ere, Getxoko Udalak izan ezik, Uribe Kostako Mankomunitateko tokiko erakunde guztiek (Barrika, Berango, Gorliz, Lemoiz, Plentzia, Sopela eta Urduliz) eta Leioa zein Erandioko udalek ere parte hartuko dute Alkarbidek koordinatutako informazio kanpainan. Iaz, "D bitamina, aberastu bere heziketa!" egitasmoa Bizkaiko hainbat udalerritan garatu zen, eta lorturiko arrakasta neurtu ostean, aurten ere kanpaina bera egitea erabaki da, foru arduradunek adierazi dutenez. Getxoko Udalak hainbat urteetan "B eta bereziki D eredua" sustatu izan ditu, Getxoko PPren kritika gogorren artean. Era berean, 2002an Arartekok Getxoko Udala gogor kritikatu zuen kanpaina horretan Iñaki Zarraoa alkateak gurasoei B eta D ereduen aldeko gutuna bidali izana. Orduan Mertxe Agundez zen jarduneko Ararteko, egun Eusko Legebiltzarrean PSE-EEko ordezkaria dena. Gerora, Getxoko Euskara Zerbitzuak kanpaina aldatu eta A, B eta D ereduei buruzko informazioa zabaldu du. Argazkian, 2008ko apirilaren 24an Getxoko udaletxearen aurrean euskalgintzak egindako kontzentrazioaren irudi bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun