Imanol Landa Getxoko alkatea pozik agertu da. Izan ere, aurtengoa da Zinegoak udalerrira heltzen den zazpigarren urtea. Zinegoen helburua oso garrantzitsua da Landaren ustez, “gay, lesbiana eta transexualen normalizazio sozialaren alde egiten baitu, pertsona talde hauek beren izaera naturaltasunarekin bizitzeko eskubidea eta beharra dutelako, eta berdintasun eskubidea bultzatzen baitu ezberdintasunetik”.
Biharko proiekzioen laburpena
50eko hamarkadako Buenos Airesen kokatzen den komedia musikala dugu "Que el mundo sepa de mi". Bertan, Julieta gazteak bere familia eta bizilagunen aurreiritziei aurre egin beharko die neska bat maitatzeagatik. Abesti gogoraerrazak ondo bukatu ezin duen maitasun istorio batentzat. "Grease" argentinarra eta lesbikoa da.
Bestalde, Sasaren amak amets bat du: bere semea piano-jole ospetsua izatea. Berak, ordea, bestelako ametsa du: Mr. Weber, bere piano irakaslea, beste hiri batera joateko zorian dagoena. Sasaren bihotza apurtu egin da eta hori aitortu ahal dion pertsona bakarra bere lagun Jiao da. Montenegroko familia tradizional bateko semea den aldetik, Alemanian bizi arren, zaila da armairutik irtetea. Beraz, Sašsak zera sinestarazi dio bere aitari: Jiao bere neska-laguna dela. Hala ere, garrantzirik gabeko gezur batekin hasi zena egundoko korapiloa bihurtu da bere anaia Jiaorekin elkarrenganatu denean. Gezur guztiak ezagutu dira eta, hondamena izan zitekeena aukera berri bat izan da Sasarentzat.
Aurreko urteetan bezala, Uribe Kosta eskualdean ere izango dugu Bilboko gay-lesbo-trans nazioarteko zinemaldiaz gozatzeko aukera. Bihar, asteartea, "Que el mundo sepa de mi" film labur argentinarra eta “Sasa” film luze alemaniarra ikusgai izango dira Algortako kultur etxean, Villamonten. Bigarren hori jatorrizko bertsioan (alemana, serbo-kroaziera eta bosniera), espainolezko azpitituluekin. Hitzordua iluntzeko zortzietan jarri dute. Hurrengo bi saioak, berriz, Kultur Leioan izango dira, ordu berean. Etzi, asteazkena, "Goddak mit navn er lasbick" dokumentala proiektatuko dute danieraz, espainolezko azpitituluekin, "Me gustaria estar enamorada... a veces me siento tan sola" film laburrarekin batera. Ostegunean, berriz, gay film labur sorta eskainiko dute. Argazkian, "Que el mundo sepa de mi" filmaren pasarteetako bat / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun