Leioako aita-amek 135 galdera egin dizkiote familientzako orientazio zerbitzuari
Leioako Udalak Etxadiren bitartez martxan duen familientzako orientazio zerbitzua "arrakastatsua" izan da 2010ean, tokiko arduradunen arabera. Uztailaren 1etik abenduaren 31ra, 135 kontsulta hartu zituen, 127 familiengatik eratorriak –100 haurtzaro kontuez galdetzeko eta 35 nerabezaroaren kezkak argitzeko–. Galdera gehienak posta elektroniko bidez egin izan ziren: 122 kontsulta, hau da, %90. Gainontzeko %10 telefono bidez egin ziren. Hizkuntzaren aldetik %90 espainolez egin ziren eta %10 euskaraz. Bestalde, horien guztien %95 emakumeek egin zuten, hau da, ama direnek; eta gainontzeko %5 guraso bien partez egindakoak izan ziren. Galdetutako gaiei buruz, haurtzaroaren kasuan, kezka gehien eragiten dituztenak umeen jarrera eta autoestimua izaten dira. Nerabeen kasuan, berriz, aipatutako gai biez gain, alkohola eta drogen kontsumoa ere aipatu behar da. Argazkian, Leioako guraso eta seme-alabek elkarren arteko ekintzak egiten Familien Topagunean / © Leioa.net.
Familientzako orientazio zerbitzua 2010ean jarri zen martxan. Horri esker, seme-alaben hazkuntzan eta heziketan sortzen zaizkien zalantzak psikologo talde bati galdetzeko aukera izaten dute gurasoek, telefonoz, postaz edota Interneten bidez. Era berean, umeen garapen sozio-emozional, kognitibo edota psikomotorra hobetzeko prebentzio-estrategia edo hezkuntza-jarraibideei buruz galde dezakete aita-amek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun