Getxon bigarren gizona atxilotu dute astebetean urruntze-agindua urratzea egotzita
Getxoko Udaltzaingoak Bilboko 37 urteko gizonezkoa atxilotu zuen atzo, astelehena, bere bikotekide ohiarengandik urruntzeko agindua hautsi eta haren aurkako heriotza mehatxuak egitea egotzita. Emakumeak azaroan aurkeztu zuen atxilotuaren kontrako salaketa, lesioak eragin eta lapurreta egin zizkiolakoan. Horren ondorioz epaitegi batek hura babesteko agindua eman zuen, bikotekide ohiarengana edo horren etxera hurbiltzea edo edozein bitartekoz berarekin hitz egitea debekatuz gizonari. Udal getxoztarreko iturrien arabera, gizonezkoak urruntzeko agindua hautsi zuen eta zenbait telefono dei egin zizkion babestutako biktimari behin eta berriz, hil behar zuela esanez. Halaber, gutxienez behin, emakumearengandik 500 metro baino gutxiagora hurbildu zen, eta gertakari horiengatik udaltzainek atxilotu eta epailearen aurrera eraman zuten atzo. Ondoren aske utzi zuten karguekin. Joan den asteazkenean ere beste gizonezko bat, 26 urtekoa, identifikatu eta auziperatu zuen Getxoko Udaltzaingoak, urruntze-agindua urratzea leporatuta. Argazkian, Algortako Bilgune Feministaren protesta bat.
Gertakari horren aurrean, Keltse Eiguren Getxoko Berdintasun Zerbitzuko zinegotziak bere gaitzespena agertu eta honakoa adierazi du: "emakumeei herio-mehatxua egitea gertakari onartezina da, zigorrik gabe geratu behar ez dena, eta halaber, urruntzeko agindua haustearekin erasotzaileak biktimaren eskubideak urratzen jarraitzen du". Eigurenek, bide batez, gogoratu zuen Gizarte Zerbitzuetako udal arloak (944 660 101), beharrezko ikustekotan, aholkularitza juridiko eta artatze psikologikorako zerbitzu bat eskura jartzen duela, eta baita Eusko Jaurlaritzaren tratu txarren biktimentzako telefonora (900 840 111), baita Udaltzaingoaren (944 660 202) eta SOS Deiak-en (112) telefonoetara ere jo daitekeela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun