Larunbatean kontzertu bana izango da Txorimalo eta Sekeko gaztetxeetan
2011ko ots. 4a, 14:57
Ohi bezala, asteburu honetan ez dira gutxi eskualdean musikaz gozatzeko daukagun aukerak. Larunbat honetarako, Getxoko Txorimalo gaztetxean antolatu du jaialdia Koska elkarteak, hamargarren urteurrena ospatzen jarraitzeko eta, bide batez, egun Uribe Kostako irrati librea sufritzen ari den egoera ekonomiko larria apurtxo bat arintzeko. Horrenbestez, iluntzeko zortzietatik aurrera, DAR (Uribe Kosta), 4 Tragos (Ezkerraldea) eta Kasu! (Iruñea) taldeek joko dute. Sarrera 4 eurotan izango da. Bitartean, Sopelako Sekeko gaztetxean ere kontzertua izango da bihar. Gaueko bederatzietatik aurrera, Uribarritik heldutako Loputopeor eta Ustelak taldeek joko dute, sarrera doan. Bestalde, Josu Doncel abeslari algortarrak Gorlizko LightHouse Tabern (Ibarrebarri plaza 6) ostatuan eskainiko du kontzertua, bihar, 21:00etatik aurrera. Argazkian, Sekeko gaztetxea gauez / © Gazte Asanblada Sopeloztarra.Azkenik, ezin ahaztu etzi "domeka beroa" izango dela Sekeko gaztetxean. 18:30ean proiektatuko duten pelikularen ostean, hanburgesak, musika eta giro ona izango dira. Sopelako Mutil Mazizoak koadrilak aukeratutako "Donnie Darko" filma proiektatuko dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun