Bizarra Lepoan: "Eskolak euskaldundu behar duelako, egin ezazu D ereduaren alde!"

2011-2012 ikasturterako aurre-matrikulazio garaian gaude eta umeak eskolan sartzeko matrikulazio epea otsailaren 11ra arte egongo da zabalik. Iaz, EAEn, lehen aldiz matrikulatu zirenen artean, %73k D eredua aukeratu zuten, %23k B eredua eta soilik %4k hautatu zuten A eredua. Baina Getxon datuak kezkagarriagoak dira: Haur Hezkuntzako ikasleen %47,73 dabiltza D ereduan, %30,53 B ereduan eta %21,74 A ereduan. Bizarra Lepoan euskara elkartean ikasle euskaldun eleanitzak heziko dituen hezkuntzaren alde egiten dugu. Uste dugu Getxoko eta Euskal Herriko ikasle guztiek eskubidea dutela euskara ikasteko, eta, horretarako, bide bakarra D ereduan ikastea da. Horretaz gain, pentsatzen dugu ikasle guztiak euskalduntzeko hezkuntza sistema propioa eta burujabea behar dugula, eta, gainera, eskolatik kanpo ere euskararen ofizialtasuna eta euskara lehenetsiko duen hizkuntza politika eraginkorrak beharrezkoak direla. Argazkian, 2008ko apirilaren 24an Getxoko udaletxearen aurrean euskalgintzak egindako kontzentrazioaren irudi bat.