Bi adingabeko atxilotu dituzte Algortan beste horrenbeste indarkeriazko lapurreta egitea egotzita
Ertzaintzak 16 eta 17 urteko adingabeko bana atxilotu zituen atzo gauean Algortan, beste bi gazteri eta emakumezko bati labanaz lapurtzea egotzita. Eusko Jaurlaritzaren Herrizaingo Sailak gaineratutakoaren arabera, heriotza mehatxuak ere egin zizkieten biktimei. Gertaerak 23:00ak aldera izan ziren: Algortako parke batean, lapurreta egin zietela ohartarazi zioten Ertzaintzari bi gaztek. Horra gerturatuta, erasotzaileen ezaugarriei buruz galdetu zieten poliziek: labana eskuan diru-zorroa eta sakeleko telefono bat ostu omen zieten mutil bik. Minutu gutxitara, handik gertu jasotako beste lapurreta baten berri izan zuten ertzainek. Oraingo honetan, gaizkileen aurka indar egin ostean, emakume batek ezin izan zuen ekidin lapurrek poltsa eramatea. Ihes egiten ari zirela, kapela bat eta labana galdu ei zuten erasotzaileek. Dirudienez, alde egiteko autoa ere hartu zuten. Ustezko lapurrak Itzubaltzeta / Romoko errotondan geldiarazi zituen Ertzaintzak.
Atxilotutako 16 eta 17 urteko gazteei bina kreditu-txartel eta sakeleko telefono aurkitu omen zizkieten arropen artean. Biei indarkeriazko lapurreta delituak leporatzen dizkiote. Horretaz gain, gazteenari, bide segurtasunaren kontrako delitua ere egotzi diote, bere aitaren autoa gidabaimen barik erabili duelakoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun