Otsailaren 13ko Torturaren Aurkako Eguna gogoan, herenegun hasi ziren ekitaldiak Leioan. Egitarauarekin jarraituz, bihar, osteguna, bideo emanaldia izango da Kurkudi herriko tabernan, Leioatik.org webguneak iragarri duenez. Hitzordua iluntzeko zortzietan jarri dute. Larunbatean, berriz, torturaren kontrako performance-a egingo dute eguerdiko hamabietan, Tigre plazan. Azkenik, igandean, 12:30ean, Bilboko Arriaga plazatik abiatuko den manifestaziora deitu ditu herritarrak Leioako Amnistiaren Aldeko Mugimenduak. Argazkian, 2010eko urriaren 5ean, dozenaka leioaztarrek, tartean Erika Bilbaoren senideak eta AAMko kideek "Torturarik ez!" lelopeko manifestazioa deitu zuten hilaren 8rako. Irailaren 14an atxilotutako Erika Bilbaok pairatu zituen torturak salatu eta horrelakoak berriro gerta ez daitezen hainbat neurri hartzea eskatu zuten.
Joxe Arregi zizurkildarra Guardia Zibilak atxilotu zuen Madrilen 1981eko otsailaren 4an, eta bederatzi egun geroago, hilaren 13an, "komisariako infernua atzean utzi, baina Carabanchel espetxeko ospitalean sartu behar izan zuten benetan egoera tamalgarrian", AAMk urtero gogoratzen duenez. "Bere gorputza ubelduraz eta erreduraz josita zegoen, eta gutxi iraun zuen bizirik. Otsailaren 13 hartako bere hitzek ongi adierazten dute Joxe Arregik pairatu behar izan zuena. 'Oso latza izan da' esan eta heriotzaren marra igaro zuen", gaineratzen dutenez. Igande honetan betetzen dira 30 urte gertaera hartatik, eta hura gogorarazteko eta torturaren amaiera eskatzeko mobilizazioak izango dira Euskal Herri osoan zehar.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun