Etzi, ostiral herrikoia egingo dute Itzubaltzeta gaztetxean, Txoko Athletic koadrilaren eskutik. Horrenbestez, 20:00etan luncha egongo da eta, ordu bete beranduago, kontzertua Jarraitu taldearen eskutik, sarrera doan. Ezustekoa ere egongo omen da. Bestalde, Kultur Leioan kontzertua emango du Luthea Salom abeslariak, 21:00etatik aurrera. Kantautore gazte hori kanadarra da jatorriz, baina sustrai hispanoak ditu, eta gaur egun New Yorken bizi da. Hasierako kantaria izan da Alanis Morissette, Norah Jones eta Emmylou Harris bezalako artisten kontzertuetan. Malcom Burnen babesa izan du lehenengo bi diskoetan, “Out of without” eta “Sunbeam surrounded by winter” (2008) izenekoetan –Burnek Grammy bat irabazi zuen, eta U2 taldearen ekoizlea den Daniel Lanoisen ohiko soinu-ingeniaria da–. Oraingoan, kantautoreak hirugarren diskoa aurkeztuko digu. Valenti Adellek eta Chris Badamik ekoitzi dute, istorio intimistaz beterik dago, eta oso laudatua izan den berezko estiloa landu du. Sarrera 10 eurotan egongo da.
Larunbat eta igandea
Larunbatera helduta, Sentinel Rock Metal Fest jaialdia egingo dute izen bereko Erandioko rock klubean, Legazpi kaleko 4. zenbakian. Bertan, Los Cojones eta Estudio para la Locura taldeek joko dute, 20:00etatik aurrera. Itzubaltzeta gaztetxean, berriz, Hors Controle, Sin Pegas eta talde gonbidatua izango dira, 20:00etatik aurrera. Sarrera bost eurotan egongo da. Aipatu jaialdian "auzokideak eta ingurunea errespetatzea" eskatu dute.
Amaitzeko, igandean, Josu Bergara kantautoreak abestuko du Sopelako Sekeko gaztetxean, 20:00etan. Gainera, domeka bero guztietan bezala, hanburgesa goxoak, musika eta giro ona ere izango dira.
Ostegunean hasita eta datozen egunotan zehar zenbait musika emanaldi ikusteko parada izango dute eskualdeko melomanoek, gustu guztietarako gainera. Bihar bertan, Itzubaltzeta / Romoko West Side tabernan eskainiko du kontzertua Last Night taldeak, Getxo Zuzenean kontzertu zirkuituaren barruan. Saioa 20:00etan hasiko da, sarrera doan. Ordu berean, Hippie Johnny kantautoreak joko du Algortako Satistegi tabernan. Oraingoan ere musu truk gozatu ahal izango da musika doinuez. Bitartean, Getxo eta Leioako hainbat rock-and-roll zaleek sortutako Rock Bottom taldea egongo da Kalian hiri kultur gunean, Leioako metro geltokitik gertu. Kontzertua 20:30ean izango da. Osteguneko musika agendarekin amaitzeko, 22:00etatik aurrera, Plastic Clono Band taldeak joko du Sopelako Triangun. Argazkian, Kultur Leioan izango da ostiralean Luthea Salom abeslari kanadarra / © Luthea Salom.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun