Marimertxe Alcocer Algortako emakumeak aurkeztutako tortura salaketa ontzat jo du Madrilgo Lurralde Auzitegiak eta torturarik izan zen jakiteko ikerketa hasteko agindu du, Berria.info agerkari digitalak zabaldu duenez. Madrilgo 1. instrukzio epaitegiak iazko ekainean artxibatu egin zuen Alcocerren tortura salaketa, eta irailean abokatuaren helegitea atzera bota zuen. Apelazio helegitea sartu zuen orduan abokatuak. Sarritan gertatzen ez den arren, Guardia Zibilaren Madrilgo kuartelean hura artatu zuen auzi medikuak txostenean jaso zituen emakumeari ikusi zizkion markak, ubeldurak eta “izua”. Idatzita utzi zuen ubeldurak “kolpe eta ostikadek” eragindakoak izan zirela, atxilotuak “tratu txarrak” jaso zituela, eta “bortxaketa eta heriotza mehatxuak” izan zituela. Madrilgo Auzitegiaren arabera, “dudarik gabe, auzi medikuaren txostena da salaketa sartu duen lagunaren froga nagusia”. Hiru hilabete eta erdian izan zuten preso Alcocer, eta 18.000 euroko bermea ordainduta askatu zuten. Hala ere, ebazpen horrek ez du ezer aipatzen andre algortarrarekin batera atxilotu zituzten eskualdeko beste lagunek jarritako tortura salaketei buruz, Uribe Kostako Amnistiaren Aldeko Mugimenduak Etengabe bitakoraren bitartez nabarmendu duenez. Argazkian, Iñaki Zarraoa Getxoko alkate ohiak eta torturak salatutako Martxelo Otamendik lagunduta eman zuen prentsaurrekoa 2010eko martxoaren 18an Marimertxe Alcocerrek.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
