Berrikuntza lanak bukatu ostean, gaur arratsaldean inauguratuko dute modu ofizialean Algortako Borobia plaza, Bidezabalgo anbulatorio aurrean dagoen 2.410 metro koadroko espazio publikoa, Getxoko Udalak jakinarazi duenez. Horretarako, pailazo saioa eta horren ondotik mokadua eskainiko dute, 17:30etik aurrera. Aisialdi eta jolaserako gune berri hori bete egin zen, obrak amaituta, jendearentzat zabaldu zen egun berean, pasa den asteburuan. “Pozgarria da oso Borobia plaza berriak lehen egunetik izan duen arrakasta ikustea. Bidezabal auzoko eta inguruko bizilagunen gozamenerako eta aisialdirako diseinatua dago, eta segida ematen dio esparru publikoak eraldatu, berritu eta dinamizatzeko Getxok bizi duen prozesuari”, nabarmendu du Imanol Landa alkateak. Txikiek gozatzeko 342 metro koadroko jolasgune erakargarria —txirrista ikusgarria ere jarri dute—dauka orain berriztatutako plazak; baita adinekoek eta mugitzeko arazoak dituztenek atseden hartzeko esparrua du ere, banku berriekin, argiztatze hobeago eta eraginkorragoarekin, oinezkoentzako ibilbide zabalekin, eta zuhaitzekin. Argazkian, Espainiako Gobernuak emandako laguntza erabili dute Borobia plaza berritzeko.
Horrekin batera, 400 metrotik gorako luzeera daukan bidegorri tartea jarri dute, Algortako erdigunetik Azkorriko hondartzaraino bizikletaz joatea ahalbidetzen duena. “Erdigunean egon eta bertan zerbitzu asko (metroa, anbulatorioa eta Arrigunagako hondartzako sarbidea) biltzen direlako, garrantzi handikoa da gunea. Hiro dinamizatzeaz gain, jauzi handi bat eman dugu udalerri osoan bultzatu nahi dugun bidegorri sarea garatzeko. Jarduera horren bitartez, Borobia Telletxen egindako tartearekin eta, era berean, Zientoetxeko errepidearen albotik Azkorriko hondartzaraino doan Bentakoarekin lotu dugulako”, aipatu du Landak. Hondakinen gaikako bilketarako edukiontziak lurperatu dira ere, eta gutxi barru erabili ahal izango dira. Plaza egiteko lanek 800.000 euroko aurrekontua izan dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun