Getxoko Ertzaintzak 37 urteko gizonezko bat atxilotu du gaur Bilbon, erailketa saiakera eta emakumeen kontrako indarkeria delituak egotzita. Eusko Jaurlaritzaren Herrizaingo Sailak zabaldutakoaren arabera, atxilotuak labankada eman dio sabelean Getxo udalerrian (ez dute gehiago zehaztu) bizi den bikotekide ohiari. Gainera, urruntze agindua hausteagatik ere eginbideak bideratzen ari dira, gaineratu dutenez. Gertaera goizeko seiak aldera izan da: emakumezkoak Ertzaintzari deitu eta laguntza eskatu du orduan. Ertzainei adierazi dienez, bikotekide ohia giltzak erabilita bere etxean sartu da eta aizto batekin eraso egin dio. Hainbat patruila bertara joan dira, Getxo udalerrian dagoen etxebizitzara, eta emakumeak hainbat kolpe eta sabelean zauri handi bat zuela ikusi dute. Anbulantzia batek Gurutzetako ospitalera eraman du. Bitartean, beste patruila bat Bilboko hirigunera joan da, ustezko erasotzailearen bizilekura. 37 urteko gizona emakumearen bikotekide ohia da eta urruntzeko agindua zuen, polizia iturriek aipatu dutenez. Argazkian, Algortako Bilgune Feministaren protesta bat.
Agenteek ustezko erasotzailea etxean harrapatu eta atxilotu egin dute erailketa saiakera eta emakumeen kontrako indarkeria delituak leporatuta. Gainera, urruntze agindua hausteagatik eginbideak bideratzen ari dira. Atxilotua polizia-etxera eraman dute epailearen aurrera noiz eramateko zain.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun