Imanol Landa Getxoko alkateak "larritzat" jo du gaur goizean udalerriko etxebizitza batean izandako gertaera. Horren ondorioz, emakume bat erietxean dago eta Ertzaintzak ustezko erasotzailea atxilotu du, genero indarkeriaren delitua eta urruntzeko kautelazko neurriak haustea egotzita. Gizona Udaltzaingoak duela hamar egun bere biktimarengandik eta bere etxebizitzatik urruntzeko agindua haustea leporatuta harrapatu zuen pertsona berbera da, udal iturriek zehaztu dutenez. Alkateak "erabateko gaitzespena eta arbuioa" agertu ditu, “emakumeenganako eraso guztiak onartezinak badira, are gehiago horren larria denean, ustezko erailketa saiakeraz hitz egiten ari garelako”. “Jasanezina izateaz gain, eraso larri hau ezin da zigorrik gabe geratu, oinarrizko eskubideen urratze larriaren aurrean gaudelako”, gaineratu du Landak. Argazkian, Getxoko udaltzain bat, artxiboko irudian.
Azpimarratu duenez, “emakumeenganako indarkeria gizarte honetako gaitza dela jabetu behar dira herritarrak”. Adierazi duenez, indarrean dagoen erakundeen arteko protokoloari jarraituz, “gure esfortzu guztia ipintzen ari gara, gainontzeko erakunde administratiboekin eta judizial eskudunekin batera, ahal den neurrian mota honetako erasoak prebenitzeko eta ekiditeko”. Alkateak tratu txar fisiko eta psikikoen emakume biktimak animatu ditu, Gizarte Zerbitzuetako udal arlora jotzeko (944 660 101), "egoeratik ateratzen laguntzeko arreta emango dietelako". Era berean, Eusko Jaurlaritzaren tratu txarren biktimentzako telefonora (900 840 111), Udaltzaingora (944 660 202) eta SOS Deiak-era (112) jo daitekeela gogoratu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun