Gizon bat atxilotu dute Algortan berriro ere urruntzeko agindua haustea egotzita
Urtarrilaren 26an bere bikotekide ohiarengandik urruntzeko zuen agindua haustea egotzi zioten gazte berbera, S.C.V. inizialak dituen 26 urteko gizona, atxilotu du gaur Getxoko Udaltzaingoak. Udal iturriek zabaldu dutenez, arlo horretako zaintza eta jarraitze lanak egiten ari ziren poliziek topatu dute Algortako kale batean, bertara ezin denean hurbildu, bikotekide ohia herrian bizi delako. Berehala, atxilotu eta epailearen aurrera eraman dute udaltzainek. Gertakari honen aurrean, Keltse Eiguren Berdintasun zinegotziak bere gaitzespena agertzeaz gain, adierazi du “urruntze-agindu bat ez betetzeak esan nahi duela erasotzaileak biktimaren eskubideak urratzen jarraitzen duela”. Azpimarratu duenez, “horrelako ekintzek aipatu eskubideak beldurrik gabe erabiltzea galarazten dute”. Argazkian, Algortako Bilgune Feministaren protesta bat.
Eigurenek, bide batez, gogoratu du Gizarte Zerbitzuetako udal arloak (944 660 101), beharrezko ikustekotan, aholkularitza juridiko eta artatze psikologikorako zerbitzu bat eskura jartzen duela. Era berean, Eusko Jaurlaritzaren tratu txarren biktimentzako telefonora (900 840 111), Udaltzaingora (944 660 202) eta SOS Deiak-era (112) jo daitekeela gogoratu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun