"Algortako Aldapa parkea eta bere inguruak berritu eta modernizatu dira honez gero, eta hori lortzeko egin diren lanak irisgarritasun eta eraginkortasun energetikoaren irizpideei jarraiki gauzatu dira", udal iturriek adierazi dutenez. Tartean, ez dira gutxi izan auzokideen protestak. Plazaren irekiera ofiziala gaur arratsaldean egingo dute. Hori dela eta, Getxoko Udalak ospakizun ekitaldia antolatu du 17:30etik aurrera, haurrei zuzendutako pailazoen saio batekin eta ondorengo mokaduarekin. 5.000 metro koadro inguruko plaza da, eta bertako zaharberritze lanak amaituta, belaunaldi desberdinentzako aisialdirako eta jolasteko elementuak ditu. “Parkearen diseinuari dagokionez, udalerriko gainontzeko parkeetan egiten ari garenarekin bat etorriz, belaunaldi artekoaren ikuspuntutik dihardugu esparru hauetan, adinari erreparatu gabe, edozein pertsona sar dadin”, aipatu du Imanol Landa alkateak. Proiektuaren aurrekontua milioi eurotik gorakoa izan da. Argazkian, joan den ostiralean inauguratu zuten eraberritutako Borobia plaza, Algortan / © Getxoko Udala.
Horren harira, estalperik gabe kirola egiteko gunea egokitu da –kirol askotako pista, rokodromoa eta adinekoentzako gimnasiako aparatuekin–; umeentzako jolas berriak hartzeko gune zabalagoa dauka; hiri apaingarri berriak jarri dira; bidegorri tarte berria egin da auzoan eta oinezkoentzako ibilbideak zabaldu dira. Parkeak, gainera, lorategi eta zuhaitz eremu handia du. Paisaia lehengoratzeko ekimenarekin bat etorriz, esparru horretan "ibiltzea errazago" egin da, “mugitzeko zailtasun handiagoak dituzten pertsonek ere, parkeaz gozatzeko aukera izan dezaten”, aipatu du alkateak, eta eraginkortasun energetikoaren irizpideak betetzen dituzten argi berriak ipini dira. Horrekin guztiarekin batera, euri-ura hartzeko sarea zaharberritu da, auzoan dagoen uholde arriskua gutxitzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun