"Batasuna legez kanpoko alderdiaren segida" delakoan, Sortu alderdi politikoa ez erregistratzeko eskatuko dio Fiskaltzak Espainiako Auzitegi Gorenari, Europa Press albiste agentzia espainolak zabaldu duenez. Martxoaren 11 baino lehen joko du Gorenera inpugnazioa sartzera. Fiskaltzak epea ahal den gehien agortzen badu —herenegundik hogei egun ditu—, Sortuk epe aldetik maiatzaren 22ko udal eta foru bozetan izateko aukera txikiagoak izango ditu, apirilaren 18rako hauteskunde zerrendak aurkeztuta izan behar direlako. Sortuko sustatzaileak hilaren 9an joan ziren Espainiako Gobernuko Barne Ministeriora alderdia erregistratzera. Espainiako Gobernuak pausoak eten egin ditu, eta haren estatutuak Fiskaltzari eta Estatuaren abokatuari igorri zizkien herenegun. Gobernuak haiei emandako dokumentazioaren artean, Guardia Zibilaren txosten batek dio Sortu "ETAren zerbitzura" dagoela. Espainiako Poliziaren txosten bat ere bada; alderdia ustez nola sortu den esaten du eta Batasunarekiko ustezko loturez ere ari da. Argazkian, Candido Conde Pumpido Espainiako fiskal nagusia / cc-by-sa Manhattan.
Atzo Jose Luis Ramirez Demokraziarako Epaileak (JpD) elkarteko bozeramaileak zioen Poliziak eta Guardia Zibilak gehiegikeria egin dutela Sorturi buruz egindako txostenetan. Ramirezen hitzetan, ez batek eta ez besteak ez dute eskumenik "balorazio juridikoak" egiteko, eta horiek gobernuak eta Fiskaltzak egin behar dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun