Dagoeneko Leioako 12 zonaldetan dago erabilgarri wifi zerbitzua. Joan den urtearen amaieran Pinosolon eta Kultur Leioa inguruan ezarri zuen zerbitzua Udalak, proba egiteko. Beste hamar zonaldetan ere erabilgarri dago jada. Ekimenaren helburua da leioaztarrek edo udalerria bisitatzen duen edonork Interneterako sarbidea doan izatea, herrian zehar banatutako zonalde ireki askotan. Orain, ondokoetan ere badago wifi zerbitzua: Sarrienako kirolgunea, Mendibile Jauregia, Udal Musika Eskola, Barandiaran institutua, Euskal Etxeen plaza, San Bartolome kultur gunea, Txorierriko Nagusien Etxea, Pinuetako kultur aretoa, Lamiakoko ikastetxe publikoa eta Santa Ana etorbidea / Ibaiondo plaza. Modu honetan, ordenagailu eramangarri batekin edo konexioa duen edozein gailuarekin (adibidez sakeleko telefonoa) posible izango da aipatutako zonaldeetan Interneten ibiltzea doan eta erosotasun osoz. Argazkian, erabiltzaile bat Kultur Leioa kanpoaldean / © Leioa.net.
Leioako Udalak bi lotura mota ditu eskura. Alde batetik, alde baterako konexioa dago, udalerrian denbora gutxi egiten dutenentzat pentsatuta dagoena. 24 ordutan Internetera konektatuta egotea ahalbidetzen du horrek, Kultur Leioan pasahitza eskatuz gero. Bestalde, ohiko konexioa dago. Horretarako liburutegiko txartela baino ez da beharrezkoa, horietako bakoitzak duen pasahitza Kultur Leioan aktibatuta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun