Trenbide-pasagunea lurperatzeko aurrekontuaren laurdena ordainarazi nahi diotela salatu du Urdulizko Udalak
2011ko ots. 24a, 14:06
Urdulizko trenbide-pasagunea lurperatzeko proiektuari buruz hitz egingo dute Bizkaiko Garraio Partzuergoaren (BGP) Kontseilu Nagusiaren astearteko batzarrean. Landutako azken egitasmoa Ernesto Gasco sailburuordeak berak azaldu zien, joan den ostiralean, Juan Olea alkateari eta Pilar Ardanza Garraio diputatuari. Hain zuzen ere, atzo plazaratutako prentsa oharraren bitartez, Gasteizko Gobernuko ordezkariak emandako datuen "zehaztasuna" zalantzan jarri zuen Urdulizko Udalak. "Eusko Jaurlaritzak dioenez, 36 milioi eurotik 15 milioi eurora murriztuko da proiektuaren kostua. Baina, hori ez da egia. 2007an adostutakoaren arabera, 24 milioi euroko aurrekontua zuen trenbidearen zatirik luzeena lurperatzea aurreikusten zuen egitasmoak", tokiko iturriek adierazi dutenez. Udalak 4,2 milioi euro jarri beharko dituela dioten informazioekin ere ez daude ados agintari urduliztarrek. Hala erre, "aurreko BGParekin hartutako konpromisoa berretsi" eta 3 milioi euro apartatu dituzte jada. "Argi daukaguna da ez dugula obren %25a ordainduko", ohartarazi dutenez. "El Correo Español" egunkariak larunbatean —infografia eta guzti— zabaldutakoaren arabera, 550 metroko trenbide zatia eta geltokia bera lurperatu nahi ditu PSE-EE buru duen garraio partzuergoak, EAJkoek aurreikusitakoa baino 250 metro gutxiago. Argazkian, hainbat lagun Urdulizko metro geltokian / cc-by Egizu. Hala ere, azalpen berri horiek "arrotz" zaizkio Urdulizko Udalari, "Bizkaiko Garraio Partzuergoak ez baitzuen eman bere proiektuaren xehetasunen berri ostiraleko batzarrean". "Ez Udalari, ezta Aldundiari ere, argitaratutakoaren kontra", gaineratu dutenez. Tokiko agintarien hitzetan, "dirudienez, trenbidea lurperatzeko aurreikusitako bigarren aukera darabilte eskuartean egungo BGPko arduradunek; 18 milioi euroko aurrekontua zuena, alegia. Aipatzen dituzten 15 milioi euro horiei BEZa gehitzea falta zaiela kontuan hartuta, orain urte batzuk hitz egindako kopurutik gertu egongo ginateke".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun