Euskal Herriko Unibertsitateak 2010ean tesia irakurri zuten 316 doktore berriei (159 emakume eta 157 gizon) omenaldia egingo die gaur arratsaldean. Ekitaldia 18:00etan hasiko da, Leioa eta Erandioko campuseko areto nagusian. Ekitaldi horrekin, EHUk doktoreak prestatzearen eta arlo akademikoan zein profesionalean titulu hori eskuratzearen garrantzia erakutsi nahi dio jendarteari. Hortaz, ohitura bihurtu dute doktore berriak izendatzeko ekitaldia otsailaren azken ostiralean ospatzea. Gainera, data bat dator EHUren sorrerarekin, 1980ko otsailaren bukaeran jaio baitzen, unibertsitateko iturriek gogoratu dutenez. Ekitaldian ehun bat doktore berri eta mila gonbidatu egongo dira. Halaber, 2007-2008ko doktoregoko 26 sari berezi emango dira. Sariok, nazioartean goraipamenik handiena izan duten tesiei ematen dizkie EHUk, bi urtean egindako bidea aztertu ondoren. Argazkia: © EHU.
Doktorego eta tesien garapenaren inguruko deskribapen zehatza ere egingo da ekitaldian. 2000 eta 2005 artean, urteko 200 tesi irakurtzen baziren, iaz 316 aurkeztu ziren, eta beraz, %40 igo da EHUk ikertzaileak prestatzeko ahalmena. "Dudarik gabe, igoera horrek eragina du unibertsitatearen ekoizpen zientifikoan eta berrikuntzak egiteko eta gizarteratzeko gaitasunean", azaldu dute EHUtik. Ekitaldiaren buru Iñaki Goirizelaia errektorea izango da, eta eguneko hitzaldia, EHUko Kirurgiako irakasle Joaquin Losada doktoreak eskainiko du, "Oportunidades y retos para la investigación en el area de la salud" lelopean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun