Itzubaltzeta / Romoko Santa Eugenia kalean jolasteko gune berria daukate neska-mutilek. Xake plazaren ondo-ondoan dagoen orubeko bazter batean jarri dute 442 metro koadroko jolasleku iraunkorra. Hori ofizialki inauguratzeko, pailazo emanaldia eta mokadua antolatu ditu gaur arratsalderako Getxoko Udalak. Ekitaldiak 17:30ean abiatuko dira. Adin desberdineko umeentzako gunea da egokitu dutena eta 12 jolas-aparailu dauzka guztira: zabuak, kulunkak eta txirristak dituzten jolasak, beste elementu batzuen artean. Bestalde, aparkalekua eta jolas-gunea bereizteko landare-lerro bat ipini dute bertan. Horrez gainera, jolasteko gune berriak Xake plazan dagoen umeen parketxoa osatuko du, jakina denez, kultur ikuskizun edo jardueraren bat dagoenean kendu egiten baita. Argazkian, otsailaren 11n inauguratu zuten eraberritutako Algortako Borobia plaza. Gauza bera egin zuten joan den ostiralean Aldapakoarekin / © Getxoko Udala.
“Ekipamendu berri honekin espazio berri, atsegin eta kalitatezko bat atondu dugu gure txikienek goza eta jolas dezaten. Areeta-Romoko plazaren ingurunea egokitzeko lanen barruan dago eta hauen artean dira ere, berdegune berriak, azaleko aparkaleku berriak, lotura berriak eta bidegorriak eta Metro etxe beheetako pasabidea (Ibaigane eta Santa Eugenia kaleak lotuko dituena) irekitzeko beharrak. Getxoko eremu publiko garrantzitsuenak modernizatzeko eta egokitzeko aurrera daramagun prozesuarekin segitzea da asmoa”, aipatu du Imanol Landa alkateak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun