Ostiral eta larunbat honetan, "Vaya semanita" izenburuko antzezlanaz gozatzeko aukera izango da Kultur Leioako auditorioan, Glu-Glu taldearen eskutik. Gaur bi saio izango dira: bata, 20:30ean; eta bestea, 22:00etan. Bihar, berriz, emanaldi bakarra izango da, 20:30ean. Sarrerak 15 eurotan izango dira. 2003tik hona, astean behin ematen dute ETBn, ostegunetan, "Vaya semanita" saioa. Gaurkotasunik hurbilenaren kronika da: politika, gizarteko harremanak, bikote-harremanak, lana, futbola, herri-kirolak, euskal idiosinkrasia… nahasten ditu, ikuspegi satiriko, garratz eta lotsagabe batetik. Orain, esketxik onenak zuzenean ere ikusteko aukera ematen dute. Esketx horietan, parodia agertzen da, gure gurasoek, seme-alabek, auzokoek, nagusiek, adiskideek, gure emazteen edo senarren maitaleek edota gure lagunek bizi izan dituzten egoeren parodia. Azken batean, eguneroko bizitzako pasarte txikiak dira, eta horiek ikusiz geure burua ere ikusiko dugu bertan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun