"Alternatibak osatuko dituen hautes-zerrendak kostu baxuko demokrazia honi haize pixka bat eman nahi dioten herritarrek baino ez dituzte kutsatuko. Hau da, herri honek aldaketa bat behar duela uste duten herritarrak izango dira: aberastasuna era egokiagoan banatuz, gizarte-eredu desberdina sustatuz eta giza-eskubide, eskubide zibilen eta politikoen defentsa irmoari ekinez", erantzun du Matutek.
Buruzagi ezkertiarrak "deitoragarritzat" jo du "Erreinuko gobernuak aro politiko berriari eta euskal gizarteak iragan larunbateko manifestazio jendetsuan plazaratutako eskaerari ilegalizazioaren mamua sektore gehiagorengana zabalduz" erantzun izana. Honek zera esan nahi du: "Gurea bezalako taldeen eskubide zibilak eta politikoak praktikan urratzen ari direla, gure zerrendetan hautetsi independenteen presentzia mugatu nahi dutelako. Hau guztia Berlangaren "Todos a la cárcel" filmearen antza hartzen ari da".
Matutek ohartarazi du Alternatibak ez duela "inoren tutoretzarik" onartuko. Era berean, gogorarazi du ez dagoela prest "bizitzaren zein oinarrizko eskubideen defentsari buruzko ikasbiderik" onartzeko "euren erantzukizun instituzionalaren jardunean, gure gizartean giza eskubideen urraketak saihesteko gai izan ez direnen aldetik".
Alternatiba, 2011ko otsailaren 25ean
Alternatibak gaur [ostiralean] berretsi du ez dela kikilduko Espainiako Lehendakaritza ministro Ramon Jauregiren ilegalizazio mehatxuen ostean. Aitzitik, dagokion lan politikoari askatasunez eta demokratikoki ekingo dio: "Gure ideiak defendatuko ditugu Sorturekin, EArekin zein aldaketa politikoa eta soziala helburutzat duen ezkerretik abiatutako iraultza baketsuaren alde dagoen edozein alderdi nahiz herritarrekin batera". Modu honetan erantzun dio alderdi ezkertiarreko bozeramaile Oskar Matutek atzo [ostegunean] Jauregik egindako adierazpenei. Ministroak ohartarazi zuen legez, Espainiako Gobernuak Alternatibako eta EAko hautes-zerrendak aztertuko ditu "kutsatutako" Ezker Abertzaleko kideen bila. Argazkian, "Euskal Herria Ezkerretik" akordioaren aurkezpena / © Ezker abertzalea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun