Kultur zuzendari nagusiak plazaratutako ebazpenaren bitartez, Getxoko Udalak Areetako Bizkaiko Zubiko plazan egiten ari den jarduerari onespena eman dio Bizkaiko Foru Aldundiaren Ondare Zerbitzuak. Horrenbestez, alderdi politiko batzuk, PSE-EEk kasuak kasu, lan horien legezkotasunari buruz planteatutako zalantzak "argitu ditu" Aldundiak, agintari getxoztarrek adierazitakoaren arabera. Hain zuzen ere, horixe izan zen ostiral goizean egindako ohiko udal batzarrean eztabaidatutako gaietako bat. Saioa erabat tramitezkoa izan zen eta eztabaida nagusiak mozioen atala izan zuen ardatz. Getxoko PPk Bizkaiko Zubiko plazako obrei buruzko mozioa aurkeztu zuen, alkatea oposizioko alderdiekin eta bertoko bizilagunek sortutako elkarteekin biltzeko eskatuz, plaza eta bere ingurunearen etorkizuna azaldu aldera. Popularren eskaerak PSE-EEren babesa izan zuen. Azken alderdi honek iragarri du, gainera, “Udalaren aurka auzibideetara jotzeko aukera" aztertzen ari direla, beraien hitzetan, "babestuta dagoen ingurunea izanik, legez kanpoko lanak egiten ari baitira”. Argazkian, lanean ari dira jada Bizkaiko Zubi inguruan.
Joseba Arregi Hirigintza zinegotziak aipatu zuenez, “Bizkaiko Foru Aldundiaren baimena dugu eta erakunde honek emandako txostena dugu, non Zubiko ingurunean egiten ari garen lanak legezkoak direla adierazten duen. Transbordadoreko arduradunekin adostutako lanak dira, Estatuko Funtsaren diruarekin egingo direnak. Horien helburua da monumentu esanguratsu honen edertasuna nabarmentzea, bere ingurune osoa hobetuz eta indartuz”. Udal agintariaren arabera, Gobernu Taldea tokiko hiru auzokide elkarteekin batzartu da, eta horiek “proiektuaren inguruko iritzi desberdinak agertu dituzte, eta, hain zuzen ere, horietako bati esker aldatu da egitasmoa”. Hirigintza zinegotziarentzat “PP eta PSE-EEren helburua ez da Bizkaiko Zubiko plaza hobetzea, alkatea eta Gobernu Taldearen ospea kaltetzea baizik”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun