Euskal Herrian Euskaraz (EHE) erakundeak Euskaraz Bizi Eguna 2011 antolatu du Gernika-Lumon, martxoaren 19rako; "euskaraz bizitzearen aldeko hautua indartzeko eguna", alegia. Jaia eta aldarrikapena uztartuz, "zapalkuntzari aurre egin eta Euskal Herri euskalduna eraikitzeko bidera hurbildu" nahi ditu herritarrak EHEk, gaur Donostian egindako prentsaurrekoan adierazi dutenez. Eragile euskaltzalearen ustez, "garai latzak bizi ditu" herri euskaldunak, eta euskararen aurkako erasoak "etengabeak" direla salatu dute. "Hizkuntza-ordezkapena oinarrian duen mendetako asimilazio prozesuaren ondorioz frantsesa eta gaztelera ditugu hizkuntza nagusi Euskal Herrian, euskara eta euskaldunok menpeko bihurtuz. Ezin gara euskaraz bizi, euskararen herrian bertan", kritikatu dute. Horrela, "euskaraz bizitzeko hautua egin" eta euskarari "lehentasuna" eman behar zaiola nabarmendu dute, "norbanakotik hasita". Halaber, "lehentasunezko estatusa" eskatu dute euskararentzat, Euskal Herri osoan. Argazkian, otsailaren 12an manifestazioa egin zuen EHEk Donostian, "Sasi guztien gainetik, euskaldun eta burujabe!" lelopean / © EHE.
Ildo horretan, "Euskal Herri euskaldunaren bidean urrats bat gehiago eman eta euskaraz bizi den herriaren erakusleiho izan nahi du" Gernika-Lumon ospatuko den Euskaraz Bizi Egunak. Auzolanetik abiatutako egitarau zabala prestatu dute horretarako, pasealekuaren inguruan. Goizeko 11etatik aurrera erakusketak, kale animazioa, soka-tira saioa, "IEE.EHE" dokumentalaren emanaldia, pegatinen erakusketa, euskalgintzaren azoka eta abar egongo dira. Eguerdian, urtero bezala, ehunka pertsonarentzako herri-bazkaria izango da; aurten baina, bertso-bazkaria izango da, eta Igor Elortzak, Onintza Enbeitak, Ander Elortegik eta Beñat Ugartetxeak hartuko dute parte bertan. Arratsaldean, "Sasi guztien gainetik euskaraz bizi!" goiburupean, manifestazioa egingo dute; eta bukaeran, ekitaldia. Iluntzean, berriz, kontzertuek hartuko dute lekukoa: Betagarri eta Sarkor arituko dira lehenik oholtza gainean, eta ondoren erromeria egongo da Joxpa taldearekin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun