Amnistiaren Aldeko Mugimenduaren oharra
Guardia Zibilak atxilotu dituen lau bilbotarrak inkomunikaturik aurkitzen dira
Gaur arratsaldean mobilizazioak burutuko dira Bilboko Zazpi Kaleetan eta Errekalde auzoan. Bihar Amnistiaren Aldeko Mugimenduak agerraldia burutuko du aste honetan atxilotuak izan diren herritarren senideekin. Abokatuek torturak ekiditeko hainbat neurri eskatu dituzte.
Goizaldean Grande Marlaskaren aginduz Guardia Zibilak burutu duen operazioan lau atxilotu egon dira:
- Danien Pastor (Bilboko Errekalde auzoan)
- Iñigo Zapirain (Bilboko Zazpi Kaleetan)
- Beatriz Etxeberria (Bilboko Zazpi Kaleetan, Iñigo Zapirainekin batera)
- Lorena Lopez (Bilbon, Errekalde auzoan)
Lauak Bilbokoak dira.
Gaur arratsaldean mobilizazioak burutuko dira Zazpi Kaleetan eta Errekalden. Lehen Barakaldon mobilizazioa izango dela aipatu dugu baina momentuz ez dugu horren berririk.
Ondoren, Iturbide kalean Bea Etxeberriaren etxea miatu dute.
Lau atxilotuen abokatuek Habeas Corpusa eskatu dute, alegia, atxilotuak berehala epailearen aurrera eramanak izan daitezela. Bestetik, inkomunikazioa ekiditeko neurriak ere eskatu dituzte. Senideei beraien egoeraren berri ematea maiztasun batekin, konfiantzazko medikuaren bisita izatea zortzi orduro, eta atxiloaldi osoa kameraz grabatzea.
Bihar goizean Amnistiaren Aldeko Mugimenduak agerraldia burutuko du atxilotuen senideekin.
Amnistiaren Aldeko Mugimenduaren irakurketa:
Guardia Zibilak gaur goizean Bizkaian burutu duen polizia operazioa dela eta Amnistiaren Aldeko Mugimendutik benetako kezka azaldu nahi dugu atxilotuak izan diren herritarrek jasan ditzaketen tortura basatien aurrean. Guardia Zibilak sistematikoki erabiltzen du tortura horrelako polizia operazioetan, inkomunikazio aldia baliatzen dutelarik atxilotuei mota guztietako tratu txar físiko nahiz psikologikoak eragiteko.
Euskal Herrian abian den eta astez aste gorpuzten ari den prozesu politikoaren aurrean errepresioa da Espainiako Gobernuak hartu duen jarrera politikoa. Benetako prozesu demokratikoa baten aldeko lanak errepresioa du ordainetan oraindik orain. Honela torturarekin, espetxearekin, sakabanaketarekin eta antzeko atxiloketekin erantzuten die Espainiako Gobernuak euskal herritarron askatasun, konponbide eta bake nahiei.
Errepresioaren aurrean mobilizazioa eta presio soziala areagotzea dagokigu. Horretan ari gara eta hori erakusten dute azken hilabeteotan burutuko ditugun masa mobilizazio ikaragarriek. Herritarron mugimenduak eta aktibazioak ekarriko du errepresioaren gelditzea eta desaktibazioa.
Zentzu honetan datozen egunetan Bilbon burutuko diren mobilizazioetan parte hartzeko deia luzatzen dugu.
Guardia Zibilak lau bilbotar atxilotu ditu gaur Bizkaian, ETAko kide izan eta Eduardo Puelles Espainiako poliziaren hilketarekin zer ikusirik izatea leporatuta. Iñigo Zapirain eta Beatriz Etxebarria, Bilboko Zazpi Kaleetan hartu dituzte atxilo; Lorena Lopez, Bilboko Errekalde auzoan; eta Daniel Pastor, Galdakaon. Operazioan 200 kilo lehergai aurkitu dituztela dio Guardia Zibilak. Atxilotuak inkomunikazio egoeran daude eta abokatuek Habeas Corpus aplikatzea eskatu dute. AAMk ere, "horrelako polizia operazioetan Guardia Zibilak tortura sistematikoki erabiltzen" duela baieztatu du. Atxiloketa horiek salatzeko gaur 20:00etan manifestazio bana deitu dute Errekalden eta Zazpi Kaleetako Santiago plazan, Bilboko Branka agerkari digitalak zabaldu duenez. Bitartean, Izpurako itxialdian parte hartu eta atzo ordezkari publikoen etxeetan atxilotu zituzten Aitziber Plazaola, Bergoi Madernaz, Beñat Lizeaga eta Aiala Zaldibar gazte independentistak Seyssesko espetxean sartu dituzte, asteartean Pauen euroaginduaren bista izango dutela. Aurretik, larunbatean, 15:00etan jende-katea abiatuko da Baionako San Leondik euroaginduen aurka agertzeko. Argazkian, hainbat guardia zibil Leioan, pasa den irailaren 14an.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun