Orain pare bat aste iragarri bezala, otsaileko azken osteguneko udal batzarrean aurkeztu zuen berriro EAJk, Sopelmar eta kanpina arteko lurretan 15 txalet eraikitzeko egitasmoa. Irailean ez bezala, PSE-EEren babesa ere izan zuten jelkideek; baita duela bost hilabete lortutako PPren baizkoa ere. Sopela.net agerkari digitalak zabaldu duenez, bozketa birritan egin behar izan zuten, zortzinako berdinketa eman zelako. Gauzak horrela, Imanol Garai alkatearen "kalitatezko botoa" erabaki zuen afera. Horren aurrean, "Sopelako gehiengoaren kontrako erabakia" hartzen ari zela gogoratu zioten udal agintariari ezker abertzalekoek. Independentistek zinegotzi bat galdu zuten, Eusko Abertzale Ekintza legez kanporatuta, Espainiako Auzitegi Nazionalak ordezkatzen utzi ez zuelako. Argazkian, aurreko udal hauteskundeetan lau zinegotzi lortu zituen ezker abertzaleak.
EAJ, PSE-EE eta PP ez diren beste alderdiek emandako argudioak ez zuten ezertarako balio izan. Besteak beste, txaletak altxatu nahi dituzten eremua EHUk biotopo babestua izendatzea aholkatu duen gunetik 500 metrora dagoela aipatu zuten. Ildo berean, ezker abertzaleko ordezkariek ingurumen inpaktuak aztertzea eta Hirigintza Planteamendurako Aholku Batzordeari informazioa eskatzea galdegin zuten. Josu Landaluze alkateorde jelkideak, baina, ondokoa erantzun zien: "proiektua 1998ko Sopelako arau ordezkatzaileetan oinarrituta dago eta horietan ez zen ingurumen azterketa aurreikusten, eta Hirigintza Aholku Batzorderik ez zegoen".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun