Adostasunik egon ezean Urdulizko "pasonibela kentzera baino ez" da mugatuko BGP
Urdulizko trenbide-pasagunea lurperatzeko proiektuari buruz ez zuten hitz egin atzo Bizkaiko Garraio Partzuergoaren (BGP) Kontseilu Nagusiaren batzarrean. Hala ere, horren ostean, hainbat adierazpen egin zituen Ernesto Gasco sailburuordeak. Bizkaiko Foru Aldundiak eta Urdulizko Udalak egitasmoa onartzen ez badute, "pasonibela kentzera baino ez" direla mugatuko adierazi zuen Metro Bilbaoko presidentea ere badenak, hainbat hedabidek zabaldu dutenez. Horrek 12 milioi euroko kostua izango luke. Errepidea lurperatzeko, berriz, beste 9 milioi euro gastatu beharko lituzkete. Gascok aurkeztutako proiektuaren aurrekontuari dagokionez, azkenean, 16,5 milioi eurotara igoko litzateke. 550 metroko trenbide zatia eta geltokia bera lurperatu nahi ditu PSE-EE buru duen garraio partzuergoak. Argazkian, hainbat lagun Urdulizko metro geltokian / cc-by Egizu.
"Oraindik ez du erantzunik eman Udalak, ezta Aldundiak ere", Garraio sailburuordearen arabera. Egia da foru erakundeak ez duela publiko egin bere iritzia. Proiektuaren erdia finantzatuko du Aldundiak. Tokiko agintari urduliztarrek, ordea, Gasteizko Gobernuko ordezkariak emandako datuen "zehaztasuna" zalantzan jarri zuten joan den astean. Besteak beste, trenbide-pasagunea lurperatzeko aurrekontuaren laurdena ordainarazi nahi diotela salatu zuen Urdulizko Udalak. Bitartean, bere jarrera argudiatzeko, aipatu Uribe Kostako herrian "bidaiari gutxi" daudela eta "Bizkaian lehentasun askoz garrantzitsuagoak" daudela esan zuen Gascok.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun