Asier Azpirozek jantzi du Abra Sariaren txapela

Erabiltzailearen aurpegia Ukberri 2011ko mar. 3a, 19:56

Asier Azpiroz bertsolari zubietarrak irabazi zuen pasa den ostiralean Euskal Herriko bertsolari gazteentzako Abra Sariaren hamargarren edizioa (mp3). Algortako Ugartena jatetxea lepoz bete zuten dozenaka bertsozalek eta haien aurrean sendoen agertu zen zubietarra. Dena den, txapela nork jantziko zueneko zalantza azken unera arte mantendu zen, buruz burukoan Azpirozek lehia bizia eta umoretsua izan baitzuen ordezkari lokalarekin, Imanol Uria Albizuri algortarrarekin. Zalantza sentipen hori izan zen, gainera, kartzela ariketan Algortako Bertsolari Eskolako antolatzaileek jarritako gaia. Azpirozek txapela eta abraki ikurra jazo zituen Trino Azkoitia eskolako fundatzailearen eskuetatik. Bere atzean, Imanol Uria, Ainhoa Mujika eta Iñaki Aleman izan ziren, guztiek maila aberatsa erakutsi zutela. Bertso taldea Eneko Arratek eta Ainhoa Comasek osatu zuten, sariketan zehar estu ibili zirenak. Argazkian, Imanol Uria eta Asier Azpiroz.

Aurreko edizioak

Jon Sarasua, Jesus Mari Irazu, Unai Iturriaga, Igor Elortza, Estitxu Arozena pasatu ziren lehenengo urteetan Abra jaialdiaren oholtzatik. Hasiera batean udaberriko bertso-jaialdia izan bazen ere, 2002an sariketa bihurtu zuen ALBEk. Geroztik, Nerea Elustondo, Jon Martin, Xabier Paya, Ohiana Bartra, Maddalen Arzallus, Jone Uria eta orain Asier Azpirozek bete dute Abra sariko txapeldunen zerrenda. Euskal Herri osoko bertsolari gazteekin gauzatzen ohi dute kartela, 19 eta 22 urte bitartekoak izaten direla beti. Horrezkero, 60tik gora bertsolari gazte pasatu dira Abra Sariaren taulatik. Aurtengo berrikuntza, berriz, afari formatua izan da.

Abra Sariko hamargarren edizioa osorik

Sakatu hasteko


Abra Sariko hamargarren edizioa argazkitan

Kultura Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun