Xabier Gallaga euskal preso politikoak urteak bete eta hilabete batera gaur Algortan ospatzekoa den urtebetetze jaia debeka dezaten eskatu du Dignidad y Justicia (DyJ) elkarte ultraeskuindarrak. Efe albiste-agentzia espainolak jakinarazi duenez, Espainiako Auzitegi Nazionaleko Guardia Epaitegian egin dute izapidea eta Fernando Grande-Marlaska epaileak erabakiko du aipatu eskaera aintzat hartzen duen. 1996an Miguel Angel Ayllon Espainiako Armadaren sarjentua hiltzeagatik Gallaga 343 urtez espetxean egotera zigortu zutela gogoratu du Daniel Portero abokatuak aurkeztutako debeku eskaeran. Bere ustean, "Algortako herriko tabernan" (sic) egitekoa den urtebetze jaian Gallaga "omenduko" dute. Era berean, deialdia "www.etengabe.blogsome.com" (sic) webgunean agertu denez, jaia "Amnistiaren Aldeko Mugimenduaren kontura" doala dio DyJk. Argazkian, urteko azken ostiraleko Algortako kontzentrazioaren irudietako bat.
Bere ustez, hainbat epairen bidez "AAM eta terrorista izateagatik ilegalizatu zen Askatasuna erakundearen arteko berdinketa egin daiteke". Alde horretatik, ekitaldia Askatasuna, AAM edo ezker abertzaleko erakunde ilegalizaturen batekin izan dezakeen "balizko loturaz" Espainiako Polizia Nazionala, Ertzaintza eta Guardia Zibila txostenak egin ditzaten galdatu dute. Gainera, aipatu webgunearen zein www.askatu.org-en gaineko ikerketa abia dezaten galdegin dute. Porteroren ustean, biek ala biek urtebetetzearena bezalako albisteak zabaltzean "ETAko terrorismoaren biktimen duintasuna urratu eta umiliatzen dituzte".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun