Lied jatorri alemaneko abesti erromantiko laburra izango da protagonista bihar Getxoko 26. Kontzertu Klasikoetan. Arratsaldeko 19:30etik aurrera, Rodolfo Albero tenorea eta Manuel Ariza piano-jotzailea jardungo dira Areetako Andres Isasi Musika Eskolan. Bikoteak Robert Schumann-en omenezko errezitaldia eskainiko du eta musikagile alemanaren eta beste egile batzuen lanak interpretatuko ditu. Getxoko Kultur Etxetik adierazi dutenez, Rodolfo Albero tenore aragoiarra Bartzelonan egin zuen debuta operaren arloan, Mozarten "Cosi Fan Tutte" operan Fernandorena eginez, eta birak egin ditu Rossiniren, Mozarten eta Donizettiren opera batzuekin. Oratorioari dagokionez, aipatzekoak dira egin berri dituen emanaldiak: bata, Rossiniren "Stabat Mater"-ean, Zaragozako Eliz Musikako Jaialdiaren barnean; eta, bestea, El Escorialeko Erret Monasterioko Basilikan Unibertsitate Complutenseko Udako Ikastaroen inaugurazioan. Argazkian, Areetako Andres Isasi musika eskolan izango da emanaldia / cc-by-nc-sa Agirregabiria.
Manuel Ariza piano-jotzaile eta musikagile madrildarra Europan, Hego Amerikan eta AEBetan aritzen da. Azken herrialde horretan hamar urte bizi zen, eta horren ondoren, Espainiara itzuli zen irakaskuntzan jarduteko, San Lorenzo del Escorialeko Antonio Soler Kontserbatorioan, bere kontzertu jarduera eta musikagintza baztertu gabe. Konpositore moduan zenbait ezberdinak estreinatu ditu; gainera, horietako batzuk (saxofoirako eta elektroakustikarako "The West End", adibidez) CDan erregistratu dira. Halaber, interprete gisa, disko bat grabatu du Handel-en sonaten inguruan txirula eta klaberako. Musika tresna historikoekin jotzeko nahia izan duenez, Haydn, Mozart eta Beethoven-en obren errezitaldiak eman ditu garaiko fortepiano batekin. Hainbat grabazio egin ditu irratiarentzat eta telebistarentzat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun