Eta zer dira kaleko armiarma horiek? Leioako gazteok saretzera! Marasma saretzera!
Marasma Saretzen; bakoitza bere izaerarekin, bakoitzak eman dezakeenarekin eta eman nahi duenarekin, baina betiere kolektiboaren izaera berreskuratuz. Horixe helburua, horixe da helmuga.
Azken denboran gertatu diren aldaketek gazterian eragin duten etena saihesteko, eta, aldi berean, gazte kontzientzia berpiztu eta motibazioa areagotzeko helburuarekin mamitu den proiektua dugu marasma.
Azken denboran hausnarketa egin ostean, gazteen ohitura eta joerak asko aldatu direla ondorioztatu dugu. Gazteriaren komunikatzeko ohiturak aldatu dira, politikarekiko ikuspegi negatiboa ugaritu egin da, belaunaldi ezberdinen arteko harremanak galdu egin dira, eta, gainera, gazteriak bere kolektibo izaera galdu du erabat indibidualizatzeraino. Horrekin batera, gazteok gazte izateagatik dugun problematikaren kontzientzia galdu egin dela uste dugu, baita estatu espainol eta frantsesak aurrera daramaten asimilazio kulturalak negatiboki eragin du kolektibo gisa gazteek dugun sentimenduan ere.
Honengatik, egoera honi buelta eman nahi diogu, guk gure herritik, Leioatik, hastapenetatik, moldeak hautsiz.
Horregatik hurrengo asteetan lanean hasiko gara. Gazteok egina eta gazteentzako galdetegi bat kaleratzen; gazteak gazteen begietatik begiratuta, gazteoi egotzitako estereotipo eta usteetatik aldenduta, guk bakarrik baitakigu zeintzuk diren gure arazoak, gure kezkak. Gazteok iraultzarako subjektu bilakatu behar garelako, egunerokotasuneko gauza txikietatik hasita egiten baita iraultza.
Gazteak ezagutzeko ez ezik, gazteen artean dauden mugak hautsi eta harremanak bultzatzeko ere izango da aberasgarri galdetegia. Horrela Leioako gazte diagnostikoa osatuko dugu; gure egunerokotasuneko arazoak zalantzan jarriz, gure arazoak ez direlako kasualitatea.
Armiarma izango da gure irudia, armiarmek egiten duten bezala gazteon arteko sarea osatu nahi dugulako, Leioako gaztok saretzera!! Prozesu zabala eta parte hartzailea sortu nahi dugulako, anitza, guztion artean aurrera eraman beharrekoa, bakoitza bere esparrutik baina denok batera, ez gaitzala pestizidak lokartu!!
Leioako Marasma, 2011ko martxoan
Marasma Saretzen dinamikarako 121 Krew, Norte Apache eta Goienetxe Anaiak hip hop euskaldun taldeek egindako "Imajina" bideoa (cc-publicdomain Marasma Saretzen)
Gaur Bilboko Zazpi Kaleetako 7Katu gaztetxean egindako aurkezpenaren bideoa (cc-publicdomain Marasma Saretzen)
Pasa den azaroan eman zituen lehenengo pausuak Marasma Saretzen gazte ekimena, Bilbon egindako aurkezpen baten bidez. "Gazteria ezagutu, zerk kezkatzen gaituen jakin eta gauzak aldatzeko gai garela ikustaraztea da Marasma Saretzen-en helburua", azaldu zuten orduan bultzatzaileek. Hurrengo hilabeteetan herriz herri harremanak lantzen hasiko zirela iragarri ere egin zuten. Horrezkero, hainbat herri eta ikastetxeko ekimenak izan dira Euskal Herriko zeru azpian. Pasa den larunbatean, ekimena Bilbora bueltatu zen egunotan Interneten, sarean, amaraunean edo marasman bolo-bolo dabilen "Imajina" bideo-klip-a aurkezteko. Gaur, ekimena sortu eta lau hilabetera eskualdera heldu da Marasma Saretzen, Leioako gazteek sortutako Leioa Saretzen blogari esker. "Eta zer dira kaleko armiarma horiek?" azaldu dute lehenengo batean. Argazkian, larunbateko aurkezpena 7Katu gaztetxean / cc-by-nc-sa Marasma Saretzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun