Barrikako Abaroa tenis taldeko kimuek EAE mailako Tono Paez Txapelketako finalerako sailkatu dira, iaz bezala. Sailkapen partida ikusgarria izan zen, bi taldeetako jokalariak paretsu aritu baitziren eta jokoaren maila bikaina izan baitzen, udal iturriek adierazi dutenez. Azkenean, barrikoztarrek Neguriko Jolasetari irabazi zioten, 3 eta 2. Taldeko jokalariak izan ziren: Mikel Lopez, Iñigo Torre, Diego Ayus eta Ander Juez. Horiek izan ziren norgehiagokako protagonistak, tantoak kontzentrazio eta intentsitate handiz jokatuta. Albanok gidatuta, Jolasetako kimuek ere joko bikaina erakutsi zuten, barruan duten onena emanez. Azkenean, dena erabaki zen Mikel eta Iñigok Pablo eta Alejandro neguritarren aurka binaka jokatutako norgehiagokan. Barrikako mutikoek irabazi zuten, "super tie-break"-ean (6/1 6/7 10-5). Finala Barrikako tenis pistan izango da. Santurtzi izango dute aurkari tokikoek. Ezkerraldekoek Laukarizi irabazi zioten azken partidan, 3 eta 2. Argazkia, laukote barrikoztarra finalaurrekoen ostean / © Barrika.net.
Eguraldi txarrik ez badago finala larunbatean jokatuko da, 14:00etan Barrikako pistan. Iñigo Torre eta Mikel Lopez Bizkaiko Kimuen Txapelketan lehenengo eta bigarren izan ziren, hurrenez hurren. "Hori guztia dela eta, etortzera gonbidatu egiten zaituztegu gure jokalariak ikusi eta animatzeko, seguru joko apartaz gozatzeko modua edukiko baituzue", aipatu dute Udalekoek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun