Sopelako udal arduradunek azpimarratu dutenez, herritarrei ezarriko zaien "karga inposatzailea ez da handituko", aurreikusitakoaren arabera. "Ondorioz, 2011ko zerga eta tasak izoztu egin dira, 2010ean egin zen bezala. Halaber, goi kargudunen eta udal langileriaren soldata izoztu egin da", azaldu dutenez. Ohizko gastuan ere murrizpenak izango direla aipatu dute, bere gaineko kontrola "zorrotza" izango delarik; arrazionalizazioa hobea izan dadin. Bestalde, murrizpen txikia edukiko dute kultur eta kirol aktibitateen gastuek. Murrizpenik jasoko ez duen atala giza prestazio eta laguntzena izango omen da, egoera ekonomikoa gehien pairatzen duten pertsonei zuzenduta. "Oinarri giza zerbitzuak indartu egingo dira edota pertsona nagusiei zuzendutako telealarma orokortuko da. Bestalde, indartu egingo da gizarte larrialdi eta oinarrizko errenten laguntza emate mekanismoen kontrola", azaldu dute tokiko agintariek.
Egitasmoak
Beraien hitzetan, onartutako aurrekontuarekin bete nahi diren mugarrietako batzuk ondoko hauek dira: "Iberre auzoan udal igogailua abian jartzea eta auzo berean aparkaleku bat egitea, oinezkoentzako eta ziklistentzako pasabidea eraikitzea Loroñon, Urko kirol guneko padel pista berriak, edota, Kresalia turismo eta ingurumen egitasmoa martxan jartzea". Egitasmo horiez gain, beste ekintza batzuekin ere jarraituko da: hala nola, ohizko gastuaren %0,6a mantentzea euskararen babeserako politikentzako, WIFI zonaldeen kobertura handitzea, bidegorrien planaren garapena, udal argiztapenaren hobetzea, mugikortasun, irisgarritasun eta trafiko neurri berriak ezartzea, eta hirigintza plan berrien abiaraztea babestutako etxebizitza berriak eraiki ahal izateko eta udal azpiegitura hezitzaile berria egiteko.
Sopelako Udalbatzak atzo, asteazkena, onartu zituen EAJren Gobernu Taldeak aurkeztutako aurrekontuak. Horrenbestez 2011n 15.996.665,26 euro kudeatuko ditu tokiko erakundeak. Udal iturriek gaur adierazi dutenez, "onartutako aurrekontuak krisi testuinguruan gorpuztuak dira. Hori dela eta, gastuan zorrotzak dira. Hala ere, epe luzerako finantziazioa erabiltzen dute, aurreko urteetan egindako inbertsio ahalegina mantenduz, zor maila eskasari esker". Hala ere, jelkideek ez dute prentsa oharrean zehaztu ze alderdien babesa izan duten horiek onartzeko. Dagoeneko, otsailaren hasieran, Sopelako EAJk "aurrekontuen zirriborrorik ere ez" zuela aurkeztu salatu zuen bertoko ezker abertzaleak. "Honek esan nahi du aurrekontuak aurkeztuko diren unetik osoko bilkuran eztabaidatuak izango diren egunera arteko epe laburrean ezinezkoa dela gogoeta sakonik egitea, eta are gutxiago ekarpenik edo emendakinik aurkeztea. Alegia, EAJk ez duela inolako aukerarik eman nahi aurrekontuak ezagunak eta eztabaidatuak izan daitezen", kritikatu zutenez. Argazkian, Sopelako udal batzarra, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun