Bihar, larunbata, inauteriei loturiko hainbat ekimenez gozatzeko aukera izango dute Plentziako ume, gazte zein ez hain gazteek. Tokiko Udalak antolatuta, 17:30ean umeek euren mozorroak jantzi eta Eleiz enparantzan kontzentrazioa egingo dute. Ordu erdi beranduago, kalejiran ibiliko dira herriko kaleetatik barrena. Jai-Alai frontoira arratsaldeko 6:30ak aldera helduko dira eta, bertan, inauterietako arratsaldeko jaia ospatuko dute. Ondoren, 20:00etan txiki zein helduek txokolatea dastatzeko aukera izango dute. Gaua aldera, aurrekoetan ez bezala, herrian parranda egin nahi dutenek bertan geratzeko aukera izango dute. Izan ere, hainbat tabernak goizaldeko bostak arte zabalik egoteko baimena izango dute eta joko, zozketa eta opariak antolatu dituzte gautxorientzat. Atzo bertan, udalerriko hainbat tabernarik Plentziako Udalak euren kontra jarritako isunen aurka sinadurak biltzen hasi ziren. Argazkian, hainbat ume mozorrotuta / © Sopelana.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun