Aurreko asteko mailukada zintzoa iruditu zitzaien batzuei. Beste batzuen aurpegiek politikoki zuzenaren marra igaro izana salatzen zuten. Gabriel erori zenean lurretik jaso nuen mailu honetatik gonbidapena luzatu nahi nieke lehen multzoko biri. Hain zuzen ere, sare sozialen bidez zoriondu ninduen Aintzane Ezenarro eta Eibarko EAJko mitinean nire zutabea irakurri zuen Joseba Egibarri. Egin ezazue, prentsan eta euskaraz, aurreko astean nik egin nuen ariketa bera. Egin idazki zintzo, pertsonal eta kritiko bana EAJ eta Aralarren ibilbide eta egungo jokaeraren aurrean. Erein dezagun nazio izateko derrigorra zaigun umiltasunaren hazia. Hitz egin "zuen zatiaz", eta orube horren gainean herri aske bat eraiki dezagun.
Fredi Paya bertsolari algortarrak atzo "Berria" egunkarian argitaratutako artikulua
[© Fredi Paya - Berria.info] Ez dut ulertzen leialtasuna kritika barik, ez eta kritika leialtasun barik ere. Jendeak, batek daki zergatik, leialtasuna kritikarik ezaren berme modura ulertzen du, eta kritika, leialtasunik eza balitz legez interpretatu. Batak bestearen beharra dauka egiazkoak izatekotan. Leialtasun bako kritika pasibokeria edo erasoa da. Kritika bako leialtasuna, ostera, ezin da leialtasun izan. Leialtasuna zor diozunari zure barruaren berri ez ematea erosoagoa da, konforme, baina baliagarria suerta lekiokeen informazioa ukatzen zabilzkio. Gero dago historikoki aberatsek pobreak isiltzeko erabili duten aitzakia: formak. Zuzenki lotua hainbeste gorroto dudan diskurtso bikoitzaren aferarekin. Azkenaldian batek baino gehiagok esan dit publikoki esaten ditudanak pribatuan esatekoak direla. Zein nekagarria izan behar duen lekuaren arabera gauza bat edo bestea esaten duenaren bizitzak. Zein tristea kritikak era dramatikoan bizi dituztenek gehiago ikasteari uko egin izana. Bitez abade, esker oneko sabel eta euren existentzia siglen babes barik ulertzen ez dutenentzat parrokia kohesionatzeko omiliak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun