Irakurri Gazte Asanblada Sopeloztarrak plazaratutako oharra:
Gazteok kale gorrian bizitzera behartuak
Sopelako udalaren etxebizitza politika guztiz elitista dela argi dago. Luxuzko etxeak baino ez dituzte eraikitzen eta aurreikusita dauden babes ofizialeko etxebizitza guztietatik bat ere ez da alokairurako izango. Non biziko gara? Gure soldata txikiekin, zelan ordainduko dugu 1000 euroko alokairua?
Herrian 800 etxe inguru daude hutsik eta udaletik ez zaie irtenbiderik ematen edo hauen alokairua sustatzen...
Eraiki, eraiki eta eraiki baino ez dute egiten, gune berdeak porlanarekin betez... Eta biztanleen benetako beharrei erantzun barik.
Hau Marbella dela uste al dute?
Sopela garestiegia bihurtu dute sopeloztarrentzat!
Kale gorrian bizitzera kondenatu gaituzte!
"Kale gorrian bizitzera behartuta" daudela salatu dute Gazte Asanblada Sopeloztarreko kideek
Azken aste hauetan etxebizitzaren inguruko propaganda kanpaina zabala egiten aritu dira Gazte Asanblada Sopeloztarreko (GAS) kideak. Orain egun batzuk udalerrian hutsik dauden 800 etxebizitzak alokairuan jartzeko premiaz ohartarazi zuten neska-mutilek. Joan den asteburuan, berriz, salaketa originala eta dibertigarria burutu zuten. Alokairuzko etxerik topatzen ez dutenez, "etxea" kale gorrian ipini eta bertan gosaltzen, arropa garbitzen, erratza pasatzen eta egunkaria irakurtzen goiza eman zuten, Sopela.net agerkari digitalak zabaldu duenez. Bertatik pasatu ziren guztiek Sopelako gazteek etxebizitza eskubidea bermatuta edukitzeko egin zuten eskaera ozena eta originala ikusteko aukera izan zuten. Argazkia: © Gazte Asanblada Sopeloztarra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun