Yoga, capoeira eta tai ji saioak izango dituzte doan Getxo Kiroletako bazkideek
Getxo Kirolak udal erakundeak bazkideentzako doako hiru ikastaro antolatu ditu hurrengo larunbatetarako: yoga familian, capoeira eta tai ji, hurrenez hurren. Aipatu ekimenak "kirol praktika bere alderdi zabal eta parte-hartzaileenean sustatzeko prestatu dira", tokiko iturriek adierazi dutenez. Lehenengo saioa apirilaren 2an izango da, 10:00etatik 11:30era, Algortako Fadura kiroldegiko erabilera anitzeko pabiloian. Bertan, 70 pertsonek parte hartu ahal izango dute, bikoteka. Horiek pertsona nagusi batez eta 14 urte baino gutxiagoko beste batez osatutaak egon beharko dira. Jarduera horretan edo besteetan interesa dutenek 944 308 070 edo 944 045 151 telefono zenbakira dei dezakete. Argazkian, David Bustamante "Zuku", gorriz, Sopelako Tai Ji Taldeko bere ikasleekin / © Sopelana.net.
Jarduera bereziekin jarraituz, apirilaren 9an, capoeira ikastaroa egingo dute, 11:30etik 13:30era. Saio hori Fadura kiroldegiko kantxa estalian izango da eta, oraingoan, 40 pertsona soilik onartuko dituzte. Tai ji eskola, berriz, apirilaren 16an izango da Fadurako pilotalekuen eraikineko gimnasioetako batean, 11:30etik 13:00ak arte. Borroka-arte horretan 25 pertsonek parte hartu ahal izango dute. Alvaro Gonzalez Getxoko Kirol zinegotziak capoeira eta tai ji saioak nabarmendu ditu. “Gure kirol-eskaintzan orain arte sartu ez ditugun bi modalitate dira. Bi proposamenek zer harrera-maila duten ebaluatzeko baliatuko ditugu denboraldiko gure ikastaroen programan sar daitezkeen jakiteko”, azaldu du zinegotziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun