Trenbide-pasagunea lurperatzeko sosik ez du jarri beharko Urdulizko Udalak
2011ko mar. 18a, 11:22
Urdulizko trenbide-pasagunea lurperatzeko hitzarmena adostu dute Eusko Jaurlaritzak, Bizkaiko Foru Aldundiak eta Udalak. Finean, Garraio eta Herri Lan Sailak joan den hilabetean aurkeztutako proiektua onartu dute. Hala ere, tokiko erakunde urduliztarrak ez du sos bakar bat ere jarri beharko. Bizkaiko Garraio Partzuergoaren (BGP) bitartez, Lakuako Gobernuak eta Aldundiak ordainduko dituzte erdibana egitasmoaren 15,3 milioi euroak. Euskal Trenbide Sareak (ETS) idatzitako proiektuari jarraiki, trenbidea Antsonekoa kaletik Sopelako kotxetegietara arte estali nahi dute, 550 metroko zatian. Tarte horretan, geltoki berria jarriko dute. Erdian nasa bakarra izango du horrek: 6 metro zabaleran eta 90 metro luze. Horraino heltzeko, eskailerak eta mugikortasun arazoak dituzten lagunentzako igogailua jarriko dituzte. Behin lanak hasita, 22 hilabetez luzatuko dira horiek, ETSren arabera. Hain zuzen ere, Maidagango pasonibela lurperatzen amaitu ostean hasi nahi dituzte obrak, 2012ko udaberri aldera. Argazkian, hainbat lagun Urdulizko metro geltokian / cc-by Egizu. Bizkaiko Garraio Partzuergoak martxoaren 28ko batzarrean onartuko omen du proiektua eta, alegazioak aurkezteko epe baten ostean, lehiaketara aterako dituzte obrak. Izapideek luzera joko dute, baina Maidagango pasonibeleko lanek 2012ko udaberrira arte ez direnez inauguratuko, litekeena da Urdulizko trenbide-pasagunea orduan estaltzen hastea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun