Apirilaren 7an, Trebiñutik irtengo da Korrikaren 17. edizioa. Helmuga, berriz, Donostia izango du hilaren 17an. Eskualdeari dagokionez, apirilaren 16an erandioztarrek hartutako lekukoa goizez (ikusi ordutegiak, pdf), Leioatik sartuko da eta hortik aurrera, Getxo udalerria, Berango, Sopela, Urduliz, Plentzia, Barrika, Gorliz eta Lemoiz zeharkatuko dituzte "euskalakariek", AEKko kideek euskarari zaletasunaz gain erabilera ere eskaintzen diotenentzat sortu duten hitz berria. Hamaika egun horietan eta bereziki Donostiako jaian Euskaltzaindia izango da omendua.
Apirilaren 16rako Uribe Kosta eta Erandioko Korrika ordutegiak
• 08:52:28, Erandio
• 09:38:37, Leioa
• 10:11:07, Itzubaltzeta / Romo eta Areeta
• 10:37:46, Algorta eta Getxo
• 11:25:25, Berango
• 11:39:43, Sopela
• 12:10:55, Urduliz
• 12:27:10, Plentzia
• 12:38:13, Barrika
• 12:59:40, Gorliz
• 13:25:40, Lemoiz
Ostegun honetan, martxoak 24, Korrikaren aurkezpena egingo dute Leioan. Hitzordua iluntzeko zortzietan jarri dute Andrak elkartearen lokalean, Berbalamiñe euskara taldeak jakinarazi duenez. Hurrengo egunean, berriz, Sopelan emango dute euskararen aldeko lasterketaren berri. Horrenbestez, 18:30etik aurrera, bideo emanaldia eta luncha izango dira Laiak tabernan, Aitxu! euskara taldeak aurreratu duenez. Erandion ere ostirala aukeratu dute Korrika aurkezteko. Berbots elkarteko lagunek aipatu dutenez, denetarik daukate prest: kanta eta koreografiak, moda desfilea, musika, luncha, dantzak, txalapartariak eta soinulariak, bertsoak, euskalakariak... Ekitaldia 19:30etik aurrera egingo dute, Altzagako azoka zaharrean. Argazkian, Korrika Leioan barrena duela bi urte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun