Goirizelaiak eta Zulueta egindako eskaeraren aurrean, "erabat" aurka agertu da Dolores Delgado fiskala, "epaiketaren atarian gertatu dela" argudiatuta. Bere hitzetan, "denbora nahikoa egon da zintak ikusteko". Beste bi abokatuak, aldiz, eskaerarekin bat egin dute. Bada, tribunalaren deliberazioaren ostean, astelehenera arteko atzerapena iragarri du Manuela Fernandez de Pradok, bideoen ikuskatzea "baliogarria ez" dela izan iritzita. Hala ere, zintak Auzitegi Nazionaletik ez ateratzeko agindu du, inkomunikazio aldian "atxilotuak zaintzen zebiltzan guardia zibilen irudia babesteko".
Arkaitz Goikoetxea getxoztarrari, Iñigo Gutierrez eta Aitor Cotano algortarrei eta beste lau euskal herritarrei ETAren "Bizkaia sarea" osatzea egozten diete. Lehenengoari, "Fernando Grande-Marlaska epailearen hilketa eta Benjamin Atutxa Eibarko PSE-EEko zinegotziaren bahiketa saiakerak" leporatzen dizkiote. Fiskaltzak 64 urteko espetxe zigorra eskatzen du Azkorrikoarentzat. Gutierrez eta Cotanori, berriz, 20 urteko kartzelaldia ezarri nahi diete, "talde terroristako kide izatea" egotzita. Horretaz gain, beste sei lagun daude auziperatuta, "Bizkaia sarea" osatzen zutelakoan. Beste laurak bezala, Frantzian espetxeratuta daude Aitor Artetxe Rodriguez eta Asier Borrero Toribio algortarrak, "epaiketaren zain", Europa Pressek aipatutakoaren arabera.
Bigarrenez atzeratu egin dute Arkaitz Goikoetxea, Iñigo Gutierrez eta Aitor Cotanoren kontrako epaiketa
Espainiako Auzitegi Nazionaleko Zigor arloko lehen aretoak astelehenera arte atzeratu egin du Arkaitz Goikoetxea, Iñigo Gutierrez, Aitor Cotano eta beste lau euskal herritarrei aste hasieratik egin behar zieten epaiketa, Europa Press albiste agentzia espainolak zabaldu duenez. Atzo ere erabaki bera hartu zuen Manuela Fernandez de Prado tribunaleko presidenteak, akusatuak Guardia Zibilaren eskuetan atxilotuta egon ziren egunetan grabatu ziren bideoak ikusteko aukera emateko abokatuei. Gaurko saioa hasi bezain laster, epaiketa atzeratzea eskatu du Jone Goirizelaia letraduak, aipatu bideoak "irregulartasun teknikoak" dituztela iritzita; eta hortaz, irudi guztiak ezin direnez ikusi, defentsarako eskubidea urratuta dagoela. Bitartean, Arantza Zulueta abokatuak irudien pixelatua kentzea eskatu du, baita horien azterketa periziala egitea ere. Bere hitzetan, auzian dauden 84 artxiboetatik 14 baino ez dituzte eskura izan defentsako letraduek. Horretaz gain, horietatik batzuk martxoan bertan aldatu egin dituztela salatu du. Azkenik, Zuluetaren arabera, Baltasar Garzonek grabatzea agindu zuenetik, 100 ordu eman zituzten Guardia Zibilaren egoitzan atxilotuek. Irudiek, baina, 72 ordu baino ez dituzte azaltzen. Argazkian, auzokideak Cotano eta Goikoetxearen irudiak sostengatzen, aurreko batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun