“Egoerak argi erakutsi du. Neurri handieneko kamioiak arazorik gabe igaro dira, ondoko kaleetatik inolako zirkulazio eta espazio problemarik gabe. Ez da istilurik izan, ezta zirkulazio eteterik ere. Hau da, Marisa Arrueren PPk iragarri zuen gertaerarik ez da jazo. Errealitatea manipulatzeko beste saiakera bat izan zen”, gehitu du Loroñok. Trailer bakoitzak aipatu plaketako hiru unitate garraiatzen ditu. Aste honetan zehar eta hurrengoetan ibilgailu horiek Getxo Antzoki inguruko kaleetatik ibiliko dira berriro. Kultur gunearen eraikuntzarako materialak garraiatzeko erabili diren kamioi handienak dira, orain arte neurri handikoak erakinaren egituraren altzairua garraiatu dutenak izan baitira; 12 metro luzerakoak, hain zuzen ere.
Ondoko irudiak zabaldu ditu Getxoko Udalak:
Algortako San Nikolas plazako lurzoru berriaren egitura osatzeko materialak garraiatu dituzte gaur edukiera handiko hainbat kamioik, Getxoko Udalak zabaldu duenez. Hain zuzen ere, plaka albeolarrak eraman dituzte Getxo Antzokiaren obra guneraino. Horiek aparkalekuaren estalkiaren edo plazako lurraren forjaketaren egiturarako izango dira. Neurriak oso handiak direnez, 1,20 metro zabalera, 11,60 metro luzera eta 50 zentimetro lodiera, garraiatzeko 16,50 metroko luzerako kamioiak erabili behar izan dira, tokiko arduradunek zehaztu dutenez. Ibilgailuak ondoko bideetatik igaro dira, "inolako arazorik gabe" eta Telletxe kaletik sartu ondoren, Algortako Etorbiderantz joan dira, azkenean obren eremuan sartzeko. “Trailer hauek heltzeak agerian utzi du Marisa Arruek aurreko astean hedabideen aurrean egindako salaketa (espainolez) gezur borobila baino ez zela eta, horrekin, proiektuan lan egiten duten teknikari taldea eta Gobernu Taldea ere desprestigiatzen saiatu zela”, nabarmendu du Josu Loroño Komunikazioko eta Herritarren Arretarako zinegotziak. Argazkia: © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun