Manifestaziorako oharra: Gerra inperialistarik ez! Denok Bilbora!
Ekialdeko potentziek NBEren agindupean Libian buruturiko eraso militarren aurrean, Askapena, Ekologistak Martxan, Kakitzat, KEM-MOC, Komite Internazionalistak eta Sare antifaxista taldeok honakoa adierazi nahi dugu:
Europar Batasuneko estatuek eta AEBek NBEren oniritzi hipokritarekin hasitako gerra salatzen dugu. Gatazkaren soluzio-bide honen ondorioak, beti bezala, populazio zibilak bere heriotza, sarraski eta miseriarekin ordainduko baititu.
Hasiera-hasieratik estatu hauek gatazka honetan edukitako jokabidea salatzen dugu: interes ekonomiko eta geo-estrategikoak beti jarri baitituzte defendatzen omen dituzten bake eta demokraziaren gainetik. Zentzu honetan, espainiar estatuaren jokabidea azpimarratu nahi dugu, 2010eko lehen seihilekoan 6.8 milioi eurotan baloratutako material militarra esportatu baitzuen Libiara. Gertuko adibide da, baita ere ITP euskal enpresa, iaz Libiarekin hegazkin militarren mantenu eta konponketarako lankidetza akordioa sinatu zuena.
Eraso inperialista berri honek aurreko eraso batzuk (Irak, Afganistan) gogorarazten dizkigu, energia iturrien (gasa, petrolioa) gaineko interes ekonomikoen kontrola mantentzea helburu baitute; horregatik berriro ere eraso inperialista gisa datorren nazioarteko esku-sartze hau salatzen dugu. Gerra hau baliabide naturalen espoliazioan oinarritutako kontsumo eredu kapitalista defendatzeko sortu da, epe motzerako pentsaera arduragabez.
Jendarte zibilari dei egiten diogu hau guztia sala dezan hurrengo larunbatean, martxoaren 26an, 18:00tan Bilboko Arriaga Plazatik abiatuko den manifestazioan.
"Gerra inperialistarik ez!" lelopean, Libiako gerraren kontrako martxa deitu dute dozena erdi erakundek larunbaterako. Hitzordua Bilboko Arriaga plazan, arratsaldeko 6etan, jarri dute, Askapena, Ekologistak Martxan, Kakitzat, KEM-MOC, Komite Internazionalistak eta Sare antifaxista herri taldeek. Elkarte ekologista, antimilitarista, internazionalista eta antifaxistek salatu dute "Europar Batasuneko estatuek eta AEBek NBEren oniritzi hipokritarekin hasitako gerra". Era berean, NBEren ebazpenaren pean abiatutako eraso militarrak "populazio zibilak bere heriotza, sarraski eta miseriarekin ordainduko" duela azpimarratu dute. Horretaz gain, iazko lehen seihilekoan Espainiak Libiari 6,8 milioi eurotako balioa zuten armak saldu zizkiola gogoratu dute. Tartean, Zamudioko ITP enpresak Libiaren hegazkinen mantenu kontratua sinatua duela gogora ekarri dute. Azkenik, "eraso inperialistaren" atzean petrolioaren ustiapena dagoela iritzi diote. Irudian, manifestazioaren kartela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun