Ondoko itxura izango dute Leioandiko etxebizitzek (cc-by Irekia.net - Eusko Jaurlaritza):
Leioandi bisitatu zuten atzo, asteazkena, Iñaki Arriola Eusko Jaurlaritzaren Etxebizitza sailburuak eta Eneko Arruabarrena Leioako alkateak. Bertan, babestutako 405 etxebizitzen eraikuntza sustatuko du Lakuako Gobernuak, Visesaren bitartez. Lau bloketan banatuta, 101 etxe sozial eta babes ofizialeko beste 304 altxatuko dituzte. Eraikitze-lanak urte amaieran hasiko direla iragarri dute eta 2013ko amaierarako egotea aurreikusita dago. Egitasmoa bi fasetan garatuko dute. Lehenengoan daude bilduta sustapen publikoko BOEen multzoa hartuko duen sektorea urbanizatzeko obrak. Eusko Jaurlaritzak eta Leioako Udalak izenpetutako hitzarmenaren arabera, Etxebizitza Saila ari da, une honetan, Elexalde hiribidea eta Unibertsitaterako tranbiaren plataforma hartzen duten obra horiek gauzatzen. Bigarren faseak, berriz, sustapen pribatuko etxebizitza libreak hartuko dituen eremua urbanizatzeko obrak hartzen ditu. Beranduago gauzatuko dira, higiezinen egungo egoeraren arabera. Leioandiko urbanizazio eta eraikuntza obrak 2010eko abenduan hasi ziren. Urbanizazioan 3,2 milioi euro inbertituko dira. Argazkian, ondoko itxura izango dute etxebizitzek / cc-by Irekia.net - Eusko Jaurlaritza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun