Loroñoko oinezkoentzako pasabidea maiatzean hasiko da eraikitzen Sopelako Udala
Sopelako erdigunea eta hondartzak lotuko dituen oinezko zein txirrindularientzako pasabidea maiatzean hasiko dira eraikitzen, Udal Gobernu Batzarrak bere baiezkoa eman ondoren. Gaur egun, azpiegiturak exekuzio proiektuaren hasierako onarpena du eta behin betiko onartuko da hogei egunez publikoki aurkeztu eta gero, tokiko iturriek adierazi dutenez. Horrela, lanen kontratazioa maiatzean egin ahal izatea espero dute. Eraikitzen hasi aurretiko pausua da hori. Proiektuaren aurrekontua 600.000 eurotakoa da, Udalak berak finantzatuko duela, guztiz. Pasabidearen eraikitze lanen iraupena sei hilabetetakoa izango da. Hori dela eta, aurreikuspenen arabera, azpiegitura erabiltzen has daiteke 2011ko bukaeraren aurretik. Zaldain berria BI-2122 foru errepidearen gainetik joango da. Errepide horrek Sopela eta Barrika lotzen ditu. Azpiegiturak ia 140 metro luze izango ditu eta 4,5 metro zabal. Horrela, oinezko zein txirrindulariek erabili ahal izango dute oztoporik gabe. Argazkia: © Sopelako Udala.
“Sopelako herritarrek biziki eskatu duten azpiegitura da”, azaldu zuen Josu Landaluze alkateordeak. “Oinez zein bizikletaz igaro ahal izango dute auzotarrek segurtasun osoz, herrigunetik hondartzetaraino. Orain arte igarobidea ez zegoen horren eskura”, gaineratu duenez. Pasabideak Loroño kalea eta Uribe Basterra Etorbide berria lotuko ditu, baita zonaldea gurutzatzen duten bidegorriak ere. “Ez da bakarrik oinez eta bizikletaz doazenen mesederako izango, ibilgailuen igarobidea ere hobetuko baitu. Zonalde horretan, hain zuzen, ilarak egiten dira, batez ere udan”, esan du Landaluzek. Pasabidea metalezkoa izango da gehien bat, erdoiltzea saihesteko bereziki prestatutako altzairuz egina. Horrek bere kontserbazioa hobetuko du. Alboko bi kutxez osatuta egongo da, zeharkako habeez lotuta. Zorua irristatzearen aurka bereziki prestatuta egongo da, hormigoiz osatuta, eta gainetik mortero akriliko geruza bat izango du. Plataformaren mutur bakoitza zubi-branka banaren gainean egongo da eta erdian bost harroin jarriko dira egiturari laguntzeko. Harroin horiek eskultura itxurarekin diseinatu dira, pasabideari itxura berezia emanez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun