Etxebizitzaren euskal Behatokiak babes ofizialeko etxebizitzei buruz dioenaren arabera, 1994tik 2009ra doazen 15 urteetan, Leioa da gai honetan "ahaleginik handienetarikoa egin duen euskal udalerria". Hortaz, Leioa 13. udalerri populatuena izan arren EAEn, zortzigarren lekua okupatzen du guztira eraiki diren babes ofizialeko etxebizitzei erreparatuta. Eta Bizkaian, zortzigarren udalerri populatuena izanik, laugarrena da etxebizitza babestuan. Udal arduradunen ustez, Leioak "erakargarritasun demografikoa" duela garbi geratzen da, "kanpoko populazioa etengabe etortzen ari baita, eta bertokoek hemen geratu nahi dutelako gehienbat". Hori dela eta, azken hamarkadan, biztanleria %8 igo da, Bizkaian populazio mantendu (%1,85eko hazkundea bakarrik) eta eskualdean jaitsi egin den arren (%-0,19). "Dei-efektua adierazten du horrek, zalantzarik gabe. Bizkaiko gainerako herritarrek Leioa metropoli ardatzaren erreferentzia garbia dela ikusten dute. Horrexegatik dauka, hain zuzen ere, udalerriak mila biztanle bakoitzeko 54,55 etxebizitzaren eskaera, Etxebiden agertzen den bezala, eskualdearena baino %17 altuagoa, eta Bizkaiko batez bestekoaren %23 gehiago", gaineratu dute.
Etxebizitza eskaintzarik handiena
Aspektu horretan eragiten duen elementu osagarria dira Etxebizitzaren Euskal Behatokiaren daturik berrienak, 2010eko azken hiruhilekokoak, eta Eusko Jaurlaritzaren menpekoa den erakundeak jasotako Eskaintza Eskabidearen Inkestaren araberakoak. Horiek ikusita, Leioa da EAEko 50.000 biztanletik beherako udalerrien artean, "etxebizitza eskaera handiena" daukana. Tokiko agintarien azaldu dutenez, "etxebizitza, eskaintza mota desberdinetan (erosteko edo alokatzeko, berria, erabilia, BOE edo tasatua), eskatzen duten 7.852 pertsona dago, eta Leioaren erakargarri da etxebizitza eskaintza, inguruan eta zenbaki absolutuetan, EAEko hiru hiriburuek bakarrik gainditzen baitute gure udalerria, eta Bizkaian, bi udalerrik bakarrik, baina halako hiruko populazioarekin: Getxo eta Barakaldo". Leioak dituen 7.852 etxebizitza-eskatzaile horien artean, 1.603 bakarrik omen daude udalerrian erroldatuta. Datu hori eta bere eboluzioa azken urteotan "oso adierazgarriak" dira, "kanpoko zein bertokoentzat Leioak duen erakargarritasunaren seinale ematen dute". Babes ofizialeko etxebizitzetarako lizentzien datuarekin batera, populazio profila gaztea edo adin ertainekoa dela antzeman daiteke.
Hurrengo lau urtetan babestutako mila etxebizitza baino gehiago eraikitzen hastea aurreikusten du Leioako Udalak
Hurrengo lau urteetan, babestutako mila etxebizitza baino gehiago eraikitzeko obra-lizentziak ematea aurreikusten du Leioako Udalak. Hainbat promozioz ari dira, eta haien garapena fase desberdinetan dago. Dena dela, 2011 eta 2015 artean garatuko dira, udal iturrien arabera. Babes ofizialeko etxebizitzan, Leioandin (407 etxe, eta horietatik 100 alokairurako dira), Torresolon (230), Larrakoetxean (118), Aldapabarrenan (159), Lamiakon (92), Txorierrin (78) eta Artatzan (30) altxatuko dituzte, hurrenez hurren. Aurreikuspen horrekin, "Leioak finkatu egiten du aspalditik datorren gazteentzako arrazoizko prezioko etxebizitza etengabe eskaintzeko apustua", tokiko agintarien hitzetan. "Izan ere, inguruan baino halako bost babes ofizialeko etxebizitza eraiki dira Leioan azken bost urteotan, 18,40 etxebizitza 1.000 biztanleko; konparaketa eginda, eskualdean 7 eta Bizkaian 6,8 dira. Azken 15 urteotan, gainera, ia beste mila babes ofizialeko etxebizitza eraiki dira udalerrian", azaldu dutenez. Argazkian, etxebizitzen zozketa Leioan / © Leioa.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun