Birritan atzeratu ostean, gaur abiatu da Arkaitz Goikoetxea, Iñigo Gutierrez, Aitor Cotano eta beste lau euskal herritarren kontrako epaiketa, Espainiako Auzitegi Nazionaleko Zigor arloko lehen aretoan. Hain zuzen ere, gaurko bista bideo bat ikusiz hasi dute. Horretan, Garikoitz Aspiazu "Txeroki" ETAren ustezko arduradun militarrak Benjamin Atutxa Eibarreko PSE-EEren zinegotzia "bahitzeko eta hiltzeko" agindua eman ziola aitortzen omen du Goikoetxeak, Europa Press albiste agentzia espainolak zabaldutakoaren arabera. Gogoratu, besteak beste, aipatu bideoak "irregulartasunak" zituztela argudiatuta eskatu zutela epaiketa atzeratzea Jone Goirizelaia eta Arantza Zulueta abokatuek. Aipatu irudiak froga gisa erabili dituzte epaiketan. Argazkian, auzokideak Cotano eta Goikoetxearen irudiak sostengatzen, aurreko batean.
Arkaitz Goikoetxea getxoztarrari, Iñigo Gutierrez eta Aitor Cotano algortarrei eta beste lau euskal herritarrei ETAren "Bizkaia sarea" osatzea egozten diete. Lehenengoari, "Fernando Grande-Marlaska epailearen hilketa eta Benjamin Atutxa Eibarko PSE-EEko zinegotziaren bahiketa saiakerak" leporatzen dizkiote. Fiskaltzak 64 urteko espetxe zigorra eskatzen du Azkorrikoarentzat. Gutierrez eta Cotanori, berriz, 20 urteko kartzelaldia ezarri nahi diete, "talde terroristako kide izatea" egotzita. Horretaz gain, beste sei lagun daude auziperatuta, "Bizkaia sarea" osatzen zutelakoan. Beste laurak bezala, Frantzian espetxeratuta daude Aitor Artetxe Rodriguez eta Asier Borrero Toribio algortarrak, "epaiketaren zain", Europa Pressek aipatutakoaren arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun